Page Text
________________
एगया जइणधम्मसवणे मंतिबाहडमुहाओ सिरिहेमचंदसूरिणो गुणे सोच्चा तं च आहविऊणं तम्मुहाओ जिणधम्मं सुणिऊणं मंसाहारचागपमुहनियमे गिण्हित्था । तओ सो जइणसत्थाणं अज्झयणं कुणंतो कमेण महासावगो संजाओ। नियदंताणं विसोहणटुं बत्तीसं जिणचेइयाई तह य नियपियरसेयनिमित्तं 'तिहुवणविहार'-चेइअं अन्नाइं च अणेगचेइआई करावेसी । पुव्वं सिरिअजियजिणाराहणेण अण्णोरायस्स विजओ कओ आसी, तओ तस्स सुमरणनिमित्तं तारंगायलसिहरम्मि उच्चयमं भव्वमहापासायं कराविऊणं तम्मि इक्काहिगसयंगुलपमाणं सिरिअजियणाहजिणपडिमं करावित्ता तहिं पइटुं करावित्था ।
उदयणमंतिस्स बिइयपुत्तेण अंबडेण भरुअच्छनयरम्मि 'सउणिगाविहार'चेइअस्स उद्धारो कओ तस्स पइट्ठा वि विक्कमस्स उउ-चंद-आइच्च(१२१६)वरिसम्मि सिरिहेमचंदसूरिणा विहिया ।
सिरिहेमचंदपहुणो उवएसेण कुमारवालो नरिंदो समणोवासगस्स दुवालसवयाइं गिण्हित्था । ताहे सो नियसव्वदेसेसुं जीववहं तह य जूअपमुहसत्तवसणाई निवारित्था ।
सिरिहेमचंदसूरिस्स वयणेण कुमारवालेणं सिंधुसोवीरदेसरायधाणीवीअभयपट्टणस्स भूमिखणणेण निग्गयाओ पुव्वकालियजिणपडिमाओ इह पट्टणम्मि आणाविऊणं जिणचेइएसु पइट्टाविआओ।
___ एवं आयरियसिरिहेमचंदसूरी कुमारवालमहारायं पडिबोहिऊण तह य सव्वंगीअगंथरयणेण गुज्जरदेसस्स सिरिजिणसासणस्स य अणुवमं पहावणं काऊणं विक्कमस्स नंद-नयण-भुय-ससंक(१२२९)वरिसम्मि चउरासीइवरिसाउसो सग्गं समागओ। एवं महापुरिसाणं गुणगाणं कम्मक्खयाय होइ। तहेव इह उसहचरियविरयणे सिरिहेमचंदसूरिविरइयतिसट्ठिसलागामहापुरिसचरियस्स पढमपव्वस्स उवओगो मए विहिओ । तेण एएसिं महापुरिसाणं गुणगाणं मज्झ वि कम्मखयटुं हवेउ ।
एवं सिरिहेमचंदपहुणो संखेवओ पहावगचरियस्स समत्तीकाऊणं अहुणा तिसट्ठिसलागापुरिसचरियाइमपव्वस्स रूवरेहा मए आलिहिज्जइ -
अणाइनिहणम्मि एयम्मि जगम्मि पउरपुण्णोदएण सुलद्धमणुअभवा संखाईया पाणिणो अज्झप्पुन्नइपयं पाविआ। एएसिं पुरिसुत्तमाणं सब्भूयकित्तणाई जिणागमेसुं अणेगठाणेसुं विहियाइं । तेसिं च निद्देसो सत्थेसुं महापुरिस-सलागापुरिसाभिहाणेण निदंसिज्जइ ।
इह भरहखेत्तम्मि पत्तेगं ओसप्पिणीए तह उस्सप्पिणीए तिसट्ठी तिसट्ठी सलागापुरिसाणं गणणा किज्जइ । इमीए वट्टमाणकालहुंडावसप्पिणीए चउव्वीसं तित्थयरा, दुवालस चक्कवट्टिणो, नव वासुदेवा, नव बलदेवा, नव पडिवासुदेवा इअ तिसट्ठी सलागापुरिसा संजाया। सिरिसीलंकायरिएण नवपडिवासुदेवाणं निद्देसं अकिच्चा महापुरिसाणं चउप्पण्णं गणणा साहिया अत्थि । तहिं च जीवाणं संखा सट्ठी अत्थि, जओ सोलसइम-सत्तरसइम-अट्ठारसइमतित्थयरा एयम्मि भवम्मि च्चिय तित्थयरा चक्कवट्टिणो वि संजाया, भिण्णभिण्णभवाविक्खाए जो चिय तिवुट्ठवासुदेवो सच्चिय कालंतरम्मि सिरिमहावीरसामी नामेणं चउव्वीसइमो तित्थयरो जाओ, तेण तयविक्खाए एगूणसट्ठी सलागापुरिसा गणिज्जंति ।
७०
| SR No. | 521042 |
| Book Title | Nandanvan Kalpataru 2019 06 SrNo 42 |
| Original Sutra Author | N/A |
| Author | Kirtitrai |
| Publisher | Jain Granth Prakashan Samiti |
| Publication Year | 2019 |
| Total Pages | 136 |
| Language | Sanskrit, Prakrit |
| Classification | Magazine, India_Nandanvan Kalpataru, & India |
| File Size | 10 MB |