________________
आयरियविजयकत्थूरसूरिविरइयं सिरिचंदरायचरियं
मंगलायरणं पढमो पुढवीनाहो, जो आसी तित्थनायगो पढमो । तं जिणयंदं वंदे, नाहिसुयं सूरसरिसाहं ॥१॥ निम्मलयर-कंति-सिहा-भूसियसिरयं उसहजिणंदस्स । जाओ पोम्मदहाओ, सिंधुनईए पवाहो कि? ॥२॥ सहिऊण छुहं लद्धं, केवलनाणं समप्पियं जेण । नियमाऊए लोए, सो जणणीवच्छलो जयउ ॥३॥ जास य वंसाहरणा, एसरियजुया सुभोगिणो भूवा । नाणं लहिऊणाऽऽयं-सघरे सिववरवहुं वरिआ ॥४॥ बल्ले इक्खुरसासी, पारणगे सो वि चेव संजाओ । महुरो इक्खुरसो सो, कुणेउ भदं सुभत्ताणं ॥५॥ बारसअंगधरो जो, सुत्तत्थाणं परूवगो निच्चं । जंगमनाणसमुदं, नमेमि तं पुंडरीगगणिं ॥६॥ भवियाण इट्ठदाइणि !, मणगयतमहरणि ! सारए ! तं च । सीलायारकहाए, वत्तुस्स ममाऽऽणणे वससु ॥७॥ गुणरयणनियरभरिओ, गुरुवारिनिही तरिज्जइ कहमिमो । जस्सुवयारोऽणंतो, तं गुरुपायं नमसामि ॥८॥ पगुरुसिरिनेमिसूरिं, तित्थसमुद्धरणतप्परं निच्चं । तवगच्छगयणतवणं, पहावसोहंतसूरिवरं ॥९॥ नमिऊण तह य सगुरुं, वच्छल्लनिहिं पसंतमुत्तिधरं । विन्नाणसूरिरायं, झाइय हं सपरबोहटुं ॥१०॥ सीलरयणरमणिज्जं, रएमि चंदनिवइस्स सच्चरियं । जं सवणुत्तंसं सइ, सिया निउणधम्मसुपवित्तं ॥११॥ एयकहारसपुरओ, विबुहाण सुहारसो मुहा होइ । तं कविवयणविलासं, सुणेह भविया कहारसिगा ॥१२॥ महुरो कहापबंधो, वयणविलासो कहागरो य बुहो । जइया सोया वियद्धो, तइया अप्पेइ महुरत्तं ॥१३॥
अह पढमो उद्देसो अत्थि वलयागारासंखिज्जदीवसमुद्दवेढिओ लक्खजोयणविच्छिण्णो जंबूरुक्खपरिमंडिओ जंबूदीवो नाम दीवो । तत्थ छक्खंडसोहियअट्टमीसोमसरिसपयासगं भरहखित्तं सयलखित्तसिरोमणिभावं भयइ। जओ तत्थ तित्थाहिरायसिरिसिद्धायलमहातित्थं पवित्तयमं सोहइ । जत्थ पत्तेयचउद्दससहस्ससरियापरिवारपरिवरिआओ गंगासिंधूओ दुण्णि वरनईओ संति । जंमि सड्ढपणवीसाऽऽरिअदेसा संति, सेसा य सव्वे अणारिअदेसा विण्णेयव्वा । भरहखित्तस्स मज्झखंडे रमणीययमपुव्वदेसो अत्थि, जहिं जिणीसरा केवलनाणं लहेइरे । तम्मि अणेगविसयसमागयाऽहिलवत्थुपरिपुण्णा अइविसाला आभापुरी नाम नयरी आसि । लंका अलगा य पुरी तीए नयरीए सोहं दट्ठणं लज्जंतीओ विव दूरं गयाओ। तीए नयरीए नियरूवनिज्जियदेविंदो दरियसत्तुनिद्दलणो वेरिवग्गजयणवीरो वीरसेणो नाम नरीसरो नीईए रज्जं पसासेइ । जओ -
५४
