________________
न्हाउं उदय-त्थिअ-ससि-संखायाथक्क-जुण्ह-जल-वरिसे । निअ-ठाणे चिटुंतो वि को न सुहिओ निरप्पीअ ॥११॥ उदयुट्ठिअस्स ससिणो समुहोकुक्कुरिअ-किंनरीहि कओ । अमिलाण-पारिजायापव्वाइअ-कप्प-कुसुमग्घो ॥१२॥ वाय-मुह-विहिअ-कमलो निम्मविआझिज्जमाण-कुमुअ-सिरी । निम्माणिअ-हरिसमणिज्झरंत-रुह-णुमिअ-सव्व-दिसो ॥१३॥ नूमिअ-गयणो सन्नुमिअ-महि-अलो ढक्किओडु-पह-पसरो । ओबालिअ-दीव-रुई पव्वालिअ-माणिणी-माणो ॥१४॥ छाइअ-जणच्छि-पसरं तम-पुंजं सव्वओ णिहोडंतो । अणिवारिअ-पह-पसरो पाडिअ-दूमिअ-पउत्थ-कुलो ॥१५॥ किरणेहिँ खं दुमंतो धवलण-कुच्चय-सिरिं तुलंतेहि ।
ओहामंतो अमओलुंडिर-नव-रुप्पमय-कुंभं ॥१६॥ जलमुल्लुडावंतो ससि-कन्ताउ अमयं विरेअंतो । पल्हत्थाविअ-गुज्झो रइ-वावड-मिहुण-हिअआओ ॥१७॥ आहोडिअ-धणुह-गुणे सर-ताडिअ-तिहुअणम्मि रइ-नाहे । दूर-विहोडिअ-सज्झस-असईणं दइअ-मेलवणो ॥१८॥ नीहार-मीसिआहि व छुह-रस-वीसालिआहि व पहाहि । तिमिरोद्धूलिअ-भुवणं गुंठतो भामिआहि नहे ॥१९।। कामि-मण-तालिअंटिर-वम्मह-आणं जगे तमाडंतो । नासविअ-भओ अहिसारिआण हारविअ-लज्जाण ॥२०॥ विउडिअ-चओर-तण्हो जुण्हाए विप्पगालिअ-दिणोम्हो । नासिअ-चक्को विरहिणि-पलावणो खं ससी चडिओ ॥२१॥ अह दोवारिअ-दाविअ-नरवइ-दंसिअ-अणेग-पाहुडओ । आभरण-कंति-दक्खविअ-सुरधणू दरिसिएभ-गई ॥२२॥ उदउग्गिअ-रवि-तेओ उग्घाडिअ-ससिह-जण-मणाणंदो । संभाविओ उविंदो इंदो आसंधिओ अह वा ॥२३॥ उल्लालिअ-णेवत्थणमुत्थंघिअ-कर-पुडं नमंत-निवे । गुलुगुंछिअच्छि उप्पेलिअच्छिणो सणिअभिक्खंतो ॥२४॥
११०
