________________
75
अह मोहनराहिवई दंसणमोहं पडुच्च वज्जरइ । जह वच्छ दिछिमोहण सत्ती तुह चिट्ठए महई ॥२७॥ ता अस्संववहार-प्पमुह-पुरे पिंडिओ मए लोगो। इय दिट्ठिमोहणेणं मोहिय तह भे धरेयव्यो ।।२८।। अह अन्नत्थ न वच्चइ नायण्णइ इयर-वयणमवि कहवि । इयर-मुहं अनियंतो चिट्ठइ य तुहेव वसवत्ती ।।२९।। वच्छ मए तुह अ च्चिय पहुत्तमेयं समप्पियमसेसं । अपमायपरेणं सया वि भवियव्वमिह तुमए ।॥३०॥ अन्नं च तुज्झ जेट्ठो चिट्ठइ जो मिच्छदसणो पुत्तो । संसय-विवज्जयाइ य उवायजणणंमि सो कुसलो ॥३१॥ इय तुह रज्जे सचिवत्तणंमि संठाविओ मए एसो। तुह कज्जे जयइ सयंपि सो विसेसेण भणिओ उ ॥३२॥ जे वि पिउभाइणो तुह नाणावरणाइणो महासुहडा । ते वि हु गरुय गरुए सामंतपए मए ठविया ॥३३॥ एएसिमवि कुबोह - अबोहाइ भडा भमंति सव्वत्थ । अखलियपसरा जे ते वि तुह करेहिंति साहज्जं ॥३४॥ किं पुण तए वि मिच्छादसणमापुच्छिऊण लोयाणं । आएसो दायव्वो न उ कत्थ वि नियय-इच्छाए ॥३५।। सम्मइंसणनामो तुह पुत्तो उण न सुंदरो अम्ह । जमहिलसइ उव्वासिउमम्ह पुराइं असेसाई ॥३६॥ निसुयं च मए नणु इह चिट्ठइ दुग्गे विवेय-गिरिसिहरे। जइणपुरंमि नरिंदो सुबोहनामो महाबाहू ॥३७॥ सद्दिट्ठी तस्स पिया तेहिं य सह संगओ सुओ तुज्झ । इय एयंमि कुपुत्ते वीसासो भे न कायव्वो ॥३८।। एत्तो चेव पवेसो रक्खेयव्वो इमस्स जत्तेण । निय- नयरेसु असंववहारप्पमुहेसु तुमए त्ति ॥३९॥ एगिदि-विगलपाडयमझं पविसेज्ज पुण जइ कर्हि चि । तह वि चिरावत्थाणं इमस्स तुमए न दायव्वं ॥४०॥
Jain Education International
For Private & Personal Use Only
www.jainelibrary.org
