________________
પિંડવિશુદ્ધિપ્રકરણ
भेसज्जवेज्जसूयणं, उवसामणवमणमाइकिरियं वा। आहारकारणेण वि, दुविह तिगिच्छं कुणइ मूढो ॥६६॥ विज्जातवप्पभावं, निवाइपूयं बलं व से नाउं । दलूण व कोहफलं, दिति भया कोहपिंडो सो ॥६७॥ लद्धिपसंसत्तिइउ, परेण उच्छाहिओ अवमओ वा। गिहिणोऽभिमाणकारी, जं मग्गइ माणपिंडो सो ॥६८॥ मायाए विविहरूवं, रूवं आहारकारणे कुणइ । गिहिस्समिमं निद्धाइ, तो बहु अडइ लोभेणं ॥६९॥ कोहे घेवरखवओ, माणे सेवइयखुड्डओ नायं । मायाएऽऽसाढभूई, लोभे केसरयसाहु त्ति ॥७०॥ थुणणे संबंधि संथवो, दुहा सो य पुव्व पच्छा वा। दायारं दाणाउ, पुव्वं पच्छा व जं थुणइ ॥७१॥ जणणिजणगाइ पुव्वं, पच्छा सासुससुरयाइ जं च जई। आयपरवयं नाउं, संबंधं कुणइ तदणुगुणं ॥७२॥ साहणजुत्ता थीदेवया य, विज्जा विवज्जए मंतो । अंतद्धाणाइफला, चुन्ना नयणंजणाइया ॥७३॥ सोहग्गदोहग्गकरा, पायपलेवाइणो य इह जोगा । पिंडट्ठमिमे दुट्ठा, जईण सुयवासियमईण ७४॥ मंगलमूलीण्हवणाइ, गब्भवीवाहकरणघायाइ । भववणमूलकम्मंति, मूलकम्मं महापावं ॥७५॥ इय वुत्ता सुत्ताउ, बत्तीस गवेसणेसणादोसा । गहणेसणदोसे दस, लेसेण भणामि ते य इमे ॥७६॥
