________________ પ્રસ્તાવના ચાંદનીનો પ્રકાશ લેખક - આચાર્ય મુનિચન્દ્રસૂરિ મ.સા. ન્યાયવિશારદ આચાર્યદેવ ભુવનભાનુસૂરિ મ. સા. નો જીવનબાગ અનેક સુગંધી ફ્લોથી મઘમઘતો હતો. છતાં કેટલીક બાબતો એવી હતી કે એને અનન્ય સાધારણ કહી શકાય. આવી જ એક બાબત એટલે ચાંદનીના પ્રકાશનો વિપુલ પ્રમાણમાં લેખન માટે ઉપયોગ. અધ્યાપન અને સંઘ- શાસનની અનેકવિધ જવાબદારીના કારણે દિવસે લેખન માટે તેઓશ્રીને સમય ઓછો મળતો. એટલે દિવ્યદર્શન સાપ્તાહિક માટે પીરસાતું મોટા ભાગનું લખાણ ચાંદનીના પ્રકાશની નિપજ છે. પ્રસ્તુત પુસ્તકમાં પૂજ્યશ્રીએ જૈન ધર્મનું કર્મ વિજ્ઞાન જેવા ગહન વિષયોની માર્મિક છણાવટ કરી છે. કોઈ પણ પ્રશ્નની સમગ્રતયા છણાવટ કરવાની પૂજ્યશ્રીની પાસે અજબ-ગજબની કળા છે. તે વિષયમાં જિજ્ઞાસુને જે જે પ્રશ્નો થવાની સંભાવના હોય તે બધા પ્રશ્નો જાતે ઊભા કરી એની વિશદ છણાવટ તબક્કાવાર કરે છે. વિષયોની શાસ્ત્રીય મીમાંસા પણ અહીં તલસ્પર્શી જોવા મળે છે. જે અનેક ગ્રંથોના દોહન વિના સંભવી ન શકે. જેમકે - કાંક્ષામોહનીય કર્મ જીવ પ્રમાદના કારણે બાંધે છે, ને પ્રમાદ મન-વચન-કાયાના યોગનાં કારણે ચાલે છે. ત્યારે યોગ વીર્યના
