________________
કુમારી બીનાબહેન સાથે આ વિનંતી પૂજ્યશ્રીનાં શ્રી ચરણોમાં કરવા છતાં તેઓશ્રી માનસિક તેમજ આધ્યાત્મિક દૃષ્ટિએ અતિ-અતિ સક્ષમ અને સમર્થ છે, એ પણ જાણીએ છીએ..!! તેથી જ અન્ય કોઈ નહિ પણ તેઓશ્રી સ્વયં જ આ કાર્ય હાથ ધરે, એવો અમારો શ્રદ્ધાસહ વિનયાનવત આગ્રહ રહ્યો... અને અમારા પર અકારણ વત્સલ એવા અમારા પૂજ્ય ગુરુદેવે સ્વીકૃતિ આપી..!! તેઓશ્રી લખાવતા ગયા, બીનાબહેન (આભાબહેન) લખતાં ગયાં, અને આ સુંદર સરસ તત્ત્વસભર કૃતિ તૈયાર થઈ. જેમાં શબ્દ-શબ્દ પૂજ્યશ્રીની જ્ઞાન ગહનતા તત્ત્વના તલસ્પર્શી ભાવો દ્વાર પરિચય મળે છે. આ કૃતિ અમારા હાથમાં આવતા, અમે ધન્ય બની ગયાં.
આ ઉપક્રમે કઈ રીતે બિરદાવું? કયા શબ્દોમાં વર્ણન કરું? બસ, હૈયું નત મસ્તકે પૂજ્યશ્રીનું ઋણ સ્વીકારે છે, અને સાથે જ ઉઋણ થવાનું બળ પણ માગે છે.!
પ્યારા વાચક.! તારા હાથમાં આ કૃતિ મૂકતાં આનંદાનુભૂતિ થાય છે. તેમાં પ્રરૂપાયેલા ભાવોને આત્મસાત કરી, આપણાં દેવાધિદેવ અરિહંત પરમાત્માનો પરિચય પામજે. અને અરિહંતમય બની આત્મઆરાધના કરવા તત્પર બનજે..!
પ્રાંતે ઉપકારી પૂજ્ય ગુરુવર્ય તથા પૂજ્ય ગુરુણી માતાનાં શ્રી ચરણોમાં અનેકશઃ પ્રણિપાત..
અધ્યાત્મયોગિની પૂ.બાપજીના સુશિષ્ય નાશિક પૂ.ડો. તરુલતાજી તા.૧-૧૧-૨૦૦૮ મહાસતીજી
