________________
મીનાબહેન કહે છે તેમ એમણે ‘ટોરેન્ટ'માં દરેકને એમનું ક્ષેત્ર જુદું પાડી આપ્યું. સાથે એવી સ્પષ્ટતા પણ કરી કે તમને કામ કરવાની ક્યારેય પ્રતિકૂળતા લાગે તો એક કલાકમાં છૂટા થઈ શકશો. મનથી કોચવાઈને કે સંબંધોના ભારથી દબાઈને વ્યવસાયમાં સાથે રહેવાની જરૂર નથી.
ઉત્તમભાઈને ખ્યાલ હતો કે સંબંધોને કારણે દબાઈ-ચંપાઈને રહેવાથી ઘણી વાર મન ઊંચાં થઈ જાય અને પારિવારિક સંબંધોમાં ક્લેશ જાગતો હોય છે. આથી જ પોતાના બંને જમાઈ દિનેશભાઈ અને દુષ્યંતભાઈને એમની સાથે જોડાવા અંગે પૂરતો વિચાર કરવા દીધો. ૧૯૭૯થી દુષ્યંતભાઈ ટોરેન્ટમાં જોડાવાનો વિચાર કરતા હતા તે છેક ૧૯૮૨ના મે મહિનામાં જોડાયા. આટલા સમયમાં એમને પૂરેપૂરી રીતે વિચારવાની તક આપી.
ઉત્તમભાઈ સહુના સ્વાસ્થ્યની ખૂબ ચિંતા રાખતા હતા. દુષ્યંતભાઈના પુત્ર જિનેશના જન્મ સમયે ફોરસેપ કરવા જતાં એને માથામાં વાગી ગયું હતું. એને ઑપરેશન કરાવવું પડે તેમ હતું. ઉત્તમભાઈને આવું ઑપરેશન ખૂબ જોખમી લાગતું હતું, આથી એમણે જુદા જુદા ડૉક્ટરો પાસે જઈને સલાહ માગી. નાના બાળકને ઍન્ટિબાયૉટિક દવા આપવામાં ખૂબ વિચાર કરવો જોઈએ તેમ કહેતા. આવા સમયે બધું કામ બાજુ પર મૂકીને ઉત્તમભાઈ દુષ્યંતભાઈ સાથે જુદા જુદા ડૉક્ટરો પાસે જતા હતા અને યોગ્ય સારવાર મળે તે માટે પ્રયત્ન કરતા હતા.
આ રીતે પોતાના પરિવારને પોતાના જ વ્યવસાયમાં રાખીને ઉદ્યોગોનો વિકાસ કરવાની આવડત ઉત્તમભાઈએ બતાવી. ઉત્તમભાઈ દાદાજી તરીકે એ બાળકો સાથે પત્તાં રમતા જોવા મળતા હતા. એમના અભ્યાસ અંગે પૂછપરછ કરતા જોવા મળતા અને એમની સાથે ક્રિકેટમૅચ માણતા પણ જોવા મળતા હતા.
એક કુટુંબવડલાના સર્જક એમના જીવનની નિવૃત્તિની પળે પરિવારની વિશેષ સંભાળ લેતા હતા.
162
