Aafatoni Aandhi Vachhe Samruddhinu Shikhar U N Mehtanu Jivan Charitra

SR No.: 032342
Original Sutra Author: N/A
Author: Kumarpal Desai
Publisher: Torrent Limited
Total Pages: 242
Language: Gujarati
Classification: Book_Gujarati
File Size: 10 MB

Page 155

સમર્પણની સુવાસ
Life is a song - sing it. Life is a game - play it. Life is a challange - meet it. Life is a dream - realize it. Life is a sacrifice - offer it.
Life is a love - enjoy it. જીવન વિશેનો કેવો સર્વગ્રાહી વિચાર ! જીવનમાં ગીત અને સંગીત છે, સ્પર્ધા અને પડકાર છે, સ્વપ્ન અને સમર્પણ છે, સ્નેહ અને સૌજન્ય છે. જીવનપ્રવાહમાં માનવીનું નિત નવું નવું સ્વરૂપે પ્રગટ થાય છે. સંજોગોને ઘાટ આપતાં એની જીવનપ્રતિમાના ઘાટ દષ્ટિગોચર થાય. પડકારને હસતે મુખે ઝીલતાં કે મૌનની ગરિમાવાળું સમર્પણ કરતાં માનવીનું શીલ પ્રગટ થાય છે.
જીવનના આ સઘળા મેઘધનુષના રંગો ઉત્તમભાઈનાં પત્ની શારદાબહેનના જીવનમાં દૃષ્ટિગોચર થાય છે. એમાં કપરો સંઘર્ષ અને હૃદયવિદારક મથામણ છે. કટુતા વિનાની સમર્પણશીલતા અને બહુજનસમાજ માટેની અપાર કરુણા છે. | ઉત્તમભાઈના જીવનમાં એમનાં પત્ની શ્રીમતી શારદાબહેન સાચા અર્થમાં એમનાં જીવનસંગિની અને સહધર્મચારિણી બની રહ્યાં. જ્યારે બીજી રીતે શારદાબહેનનું જીવન એટલે નારીસંઘર્ષની પરાકાષ્ઠા અને નારીગૌરવનું ઉન્નત શિખર. એમનામાં જેટલી સાહસિકતા છે, એટલી જ ભારોભાર સહનશીલતા છે.
જીવનવ્યવહારની જેટલી સૂક્ષ્મ અને ઊંડી સૂઝ છે, એટલી જ વ્યવસાય ચલાવી જાણવાની આગવી ક્ષમતા છે. કારમી આર્થિક સંકડામણ વચ્ચે એમણે નાદુરસ્ત તબિયત ધરાવતા ઉત્તમભાઈને સદેવ સ્નેહ અને હિંમતથી સાથ આપ્યો હતો. પોતાનાં સંતાનોને પૂરતી કેળવણી આપીને એમને જીવનવ્યવહારમાં અને વ્યવસાયના કારોબારમાં દૈવતવાળાં બનાવ્યાં.
એક સમયે શારદાબહેને પોતાના જીવનમાં ગરીબી અને આર્થિક મૂંઝવણનો સાક્ષાત્ અનુભવ કર્યો હતો. કરુણા એ માનવીના હૃદયમાં ખીલેલું સુગંધિત મનોહર પુષ્પ છે. એ અનુભવે એમના હૃદયમાં કરુણાનો પારાવાર સાગર છલકાવી દીધો. સાધક અને ચિંતક કેદારનાથજીએ કહ્યું છે કે માનવતા એટલે બીજાઓ પ્રત્યે સમભાવ. મેમદપુરથી છેક નવસારી અને મુંબઈ સુધી એમણે દાનનો પ્રવાહ દુઃખિયારાંઓની આંખમાં આંસુ લૂછવા માટે વહેવડાવ્યો.
દોહ્યલા સમયમાં શારદાબહેને કુટુંબનું ગૌરવ જાળવી રાખ્યું, તો સમૃદ્ધિના સમયમાં સમાજ, આરોગ્ય, શિક્ષણ અને ધર્મના ક્ષેત્રે ધન વહેવડાવીને કેટલાંયને સહાય કરી. ‘ટોરેન્ટ'ના વિશાળ ઔદ્યોગિક સામ્રાજ્યના પાયામાં શારદાબહેનની સમર્પણશીલતા રહેલી છે.
151