________________
भविसयत्तकहाए तहो घरि किउ लोयाचारु जाम हुआ कित्तिसेण निज्जीव ताम । जणणिए छड्डिउ भत्तारसोउ ओलग्गु ताहि घरसयलुलोउ । नउ रुअइ न कंदइ अचलदिट्टि गउ सपरिवारु धणमित्तु सिहि । किउ पवणसित्तु चंदणरसेण पाविय वयण सहुं सज्झसेण । जोइउ धणमित्तहो वयणु इहु ओसरिउ कलुणु कंदिउ अणिटु । हा भाइ पडिउ दुव्विसहु घाउ अंधारिउ जगु अत्थमित्रं ताउ । पसरिउ वामोहतमोहजालु असरणु दुत्तरु पडिवन्नु कालु ।
पालिज बिहिंमि जणणिहुं सणेहु हउं एवहिं उवसंघरमि देहु । घत्ता । कुलगोंदलि तासु वसिवि सणेहपरंपरइं।
अणुहूयई जाई ताईमि हुअई भयंकरइं॥६॥ तहो सरलसणेहि सुहाइं जाइं विलसियई आसि वियसियमुहाई। हसियइं रमियई सुहकीलियाई उच्छंगसंगसुहपीलियाई । परिहासई भिउडिपलोयणाइं लीलई अडासणभोयणाइं । आहरणवत्थमुहमंडणाई पेसणकवोलमुहचुंबणाई। मुहससिदप्पणपडिबिंबियाई कुंचियकुरुलई सिरि कुंचियाइं । दुल्ललियइं ललियइं लड्डियाई दुजणजणमाणई खंडियाइं । उजाणपवरकीलासुहाई थुइवयणविंदि विलयामुहाई।
नरवइमंदिरि गउरवसयाई एत्तियइं जेण जंतिं गयाइं । घत्ता। जं दरिसिउ जम्मु जाणिवि जणसंसारफलु।
अवसाणिं तासु जं जीविजइ तं विहलु ॥७॥ तो भणइं नवर धणयत्तजाउ लोयण फुसेवि गलिअंसुवाउ । सच्चउ पइं जंपिउ एउ माइ उवयारसारसजणपमाउ । सुमरंतहं गुणवल्लहविओइ विणु मरणिं मणि निव्वुइ न होइ। अह तं पि सुअणि साहसुन होइ अणुमरणु करणु कायरहं लोइ । सो सुअणु सुअणवल्लहपसंगि उप्पन्न तुहुंमि तहुतणइं अंगि।। तउ चरिउ वियक्खणु गुणनिउत्तु जं चवहि दीणु तं निरु अजुत्तु । जाणिजइ भड भंडणि भिडंतु परनरपसंगि महसइचरित्तु ।
धीरिम जाणिज्जइ मणुअलोइ अह मरणकालि अह सुअविओइ । घत्ता । वजोयरधीय धणमित्तहो वयणई सरिवि ।
परिहरिवि विसाउ थिय जणेरु हियवइं धरिवि ॥८॥
