________________
भविसयत्तकहाए दुवई । जा चिरु आसि महिम भोवालहो परिणयणयनिउत्तहो ।
परिवड्डियपयाव सा वदृइ एवहिं सिट्टिपुत्तहो ॥ एत्तहिवि करिवि परबलु सुदिहु अत्थाणि नरिंदहो चरिहिं सिटु । पारक्कउ कच्छाहिविण देव थंभिउ सुकें घणजालु जेम। तउ आणए सो णियभत्तिवंतु परबलहो परिहिउ जिह कयंतु । अवरुप्पर कडयालाव हुअ अवरुप्परु तजिय विहिंमि इअ। अन्निक दिसई पंचालु थक्कु होसइ संगामु कएकचक्कु । तं निसुणिवि परिओसिउ नरिंदु संपेसिउ नियसामंतविंदु । बिण्णिवि पव्वयवइ लोहजंघु हरिवाहणु पिहुमइ रणि अलंघु ।
पंचहिं सामंतहिं पुलइअंग पडिगाहिवि थिय बिण्णिवि अभंग । घत्ता। तो चलकरवालिं रणि पंचालिं झत्ति झडप्पिउ वइरिबलु।।
तं कच्छनरिदिं महणगिरिदिं महिउ जेम सायरहो जलु ॥३॥ दुवई । हरिवइलोहजंघकच्छाहिवपंचालहिं भिडंतहिं ।।
अग्गिमखंधु वसुह मेल्लाविउ पिल्लिवि दंतदंतहिं ॥ संचालिउ परबलि माणसल्लु पाडिउ अणंतु मुहलोहमल्लु। ओसारिउ अरिवारणमइंदु थिउ गलियगव्वु सामंतविंदु । मोडिउ मइंदु चित्तंगु भग्गु किउ भवणु भमिउं बलु चाउरंगु । चूरिय रह दोखंडिय तुरंग वरभडहं छिन्न करयल सखग्ग । केणवि भूवालहो कहिय वत्त परमेसर वइरिहु कह समत्त । तउ आण वहिवि सव्वहं निवेहि पंचालमच्छकच्छाहिवेहिं । पइसरिवि झडप्पिउ वइरिसिन्नु पडिभडहं भंगुरावत्तु दिन्नु । अग्गिमखंधहो मोडिउ मरद्दु कडु आविउ विवरामुहु पय? । निज्जीव जाय करिसारि सज्ज ओहह जोह परिहरिवि लज्ज । विहडिय रडंत मायंग तुंग हिंडिय सुन्नासण वरतुरंग ।
जो आउ आसि आसणि रउद्दि सो घल्लिउ पहुचिंतासमुद्दि । घत्ता । तो पहुपरिओसिं विजयपघोसिं परियणु परमामोए थिउ ।
थुइ वयणरविंदहो वंदिणविंदहो कुरुवहं जयजयकार किउ ॥४॥ दुवई । केणवि कहिउ गपि पोयणपुरि तहो अवणिंदरायहो ।
वह देव सुहडकडमद्दणु तहिं नरवइनिहायहो । तिं वयणिं आहल्लिउ नरिंदु संगिलिउ सयलसामंतविंदु । अहो तुरिउ किंपि चिंतवहो अज्जु तं होसइ दूसंथविउ कज्जु ।
