________________
दसमी सन्धी। तो करकमलकयंजलि हत्थे पहु विन्नविउ विणयमुकयत्थें । पुरपउरालंकारनियत्तें धणवइ कुक्कावहो सिउ पुत्तें। तं निमुणेविणु वयणु कुमारहो लहु आएसु दिनु पडिहारहो। पहुआएसिं सोवि पधाइउ घणवइ पुत्तसहिउ निज्झाइउ ।
आवहु पउरु लएविणु सारउ राउलि अस्थि तुम्ह हकारउ । वाइउ कोवि आउ सुनिबद्धउ तहु तुम्हहं समाणु संबंधउ। पभणई रायसिहि अविसन्नउं अम्हहं निरु विवाहु आसन्नउं । राउलि पउरकम्म संखेव्वउ वित्तइ पाणिग्गहणि करिव्वउ । तिं वयणिं विणियत्तु अखेइउ वयणु गंपि नरवइहिं निवेइउ ।
सिहि विवाहारंभि समाउलु न सरह खणु वि सरंतहो राउलु। घत्ता । तो वयणु फुरंतु भविसयत्तु विन्नवइ पहु।
पइसंतहो इत्थु फुसमि विवाहारंभु तहु ॥३॥ तं निसुणेवि चमक्किउ राणउं पहु आएमु सकक्खडमाणउं । पेसिउ कुरुड्डु समच्छरु दूवउ सोवि ताहं आसन्नीहूवउ । धणवइ सयलु कज्जु आमिल्लहो सहुं परिं राउलि संचल्लहो। तं निसुणेवि सिद्धिं आहल्लिउ कक्खडवयणवियपि सल्लिउ । सम्माणिवि दूवउ बइसारिउ अप्पुणु बंधुयत्तु ओसारिउ । दीसइ कारणु किंपि असारउ अइकक्खड्डु राउलि हक्कारउ । जइ परएसि किंपि किउ कुच्छिउ तो कहि करहं कज्जु को णच्छिउ ।
पइसिवि राउलि समउ सहायहो पहु परिओसहुँ लग्गिवि पायहो। घत्ता । फुड्ड कारणु किंपि महु नियमणि उप्पन्नु भउ ।
एहई दूएण नउ हकारिउ कहिंमि हउं ॥४॥ तं निसुणिवि परिचिंतइ दाइउ पंचहं सयहं मज्झि को वाइउ । जंपइ मम्मच्छेय सहुं राएं कवणु गहणु महु तेण वराएं। दुक्कमि तेण समउ इकंतर इउ चितंत दिनु पडिउत्तरु। चंगउ वयणु तुम्ह परिपुच्छिउ मई परएसि काई किउ कुच्छिउ । घरि अप्पणइं ताम कलि किजइ पच्छइ पुणि राउलि पइसिज्जह । पंचहिं सयहिं समउ जंतर तेण समाणु गणंति विढत्तउ।
कोवि राउलि पइड पहु रंजिवि वंछइ तं सम्माणु विहंजिवि । १ B चवंति
