________________
४५
छट्ठो सन्धी थूलाहलमुत्ताहलदामइं आहरणइं विचित्तबहुनामई । परियलउवहिवेसकल्लोलई उज्जलंकणयथालकच्चोलई । पट्टासणई कडयवेयडियई विद्दुमदुमचामीयरघडियई । सिरिकुलभवणरवणसिंगारइं दप्पणकलसचमरभिंगारइं । अंजणघुसिणतूलिपल्लंकई चरुयकडाहमुवन्नमडक्कई । संखसिप्पिबहुगुणसंभूअई अवराइमि अणेयबहुरुअई।
परियड्डिवि धणरिद्धि समारिय वणिवइ स वणरिद्धि संचारिय । घत्ता । उत्थामिय सावि नायमुद्दसिज्जइं सहिय।।
चिंतियफलसारा जा सा तिलयदीवि अहिय ॥१७॥ धणु तरुमूलजाले अणुसंधिवि उप्परि दुमहो पडाय निबंधिवि । अच्छमि जाम तित्थु वणि लीलई सुरकिन्नरविजाहर कीलई । ताम वहिवि दुप्पवणिं लाइउ सो बंधुअत्तु तहिं जि संपाइउ । लग्गई पंचसयई वोहित्थई पन्भट्टइं वेलाउलतित्थई । झीणइं 'तिथि तित्थु भमंतई कहिंमि नाहि सुहि निव्वुइ पत्तई । हुअ वणिउत्त सयल मुहकायर गलियगव्वववसाय अणायर । लुलियकेस मलपंकियविग्गह जरकप्पडनेवत्थपरिग्गह। सिढिलचरिय परिवजियसंजम निद्धण निरलंकार निरुज्जम । तं मयणाउ दीउ पिक्खंता झूरिय थोरंसुयहिं सुयंता। एउ तं वणु जहिं एण अणिहिँ किउ तं मिच्छकम्मु पाविहिं ।
डज्झइ को न महासइसाविं अम्हई खउ गय तेण जि पाविं । घत्ता । वरतरुसिहरग्गि दिट्ठ पडाय सुहावणिय ।
हक्कारइ नाइं सन्नई सिय भविसहो तणिय ॥ १८ ॥ सो पिक्खंतु पडाय महानरु वणि पइसंति जाम थोवंतरु । बिन्निवि ताम लयाहरि दिट्टइं मउअतूलि पल्लंकि निविट्ठई । तक्खणि कन्नोसन्निय वायहिं गय नासिवि पच्छन्नहिं पायहिं । तुरिउ गपि बंधुयत्तहो अक्खिउ अम्ह देउ सहुं देविए लक्खिउ । जाम न कहिंमि जाइ आयासहो ताम तुरिउ तुम्हई मि पयासहो । तं निसुणेवि सोवि संचल्लिउ पिक्खिवि जणसमूह उत्थलिउ ।
१ B वत्थई.
