________________
४४
भविसयत्तकहाए सा वायंतु एत्थु संपाइउ तुह मुहसुहदसणु निज्झाइउ । पई अक्खिउ वित्तंतु चिराणउं पट्टणु खड्ड जेम हउ राणउं । पुणु भोयणु भुंजाविउ लीलई बिन्निवि थियइं असंगाकीलई । आयउ असणिवेउ बलवंतउ सो वि पुव्वकम्मि उवसंतउ । तिं तुहं मज्झु दिन्न सहं वित्तिं मइं परिणिय परिओसियचितिं । बिपिणवि थियई भोय भुंजंतई रइरसपसरमहामयमत्तई।
एत्तिउ कालु जाउ सुहसंगउ एव्वहिं नितु उम्माहिउ अंगउ । घत्ता । चिरुमुक्क रुअंति जणणि परमसम्भावरय ।
सा मज्झु विओइ किं जीवइ किं मरिवि गय ॥१४॥ तो वरि मंतु किंपि तं किजइ जेण निययसज्जणहं मिलिजइ। . किं बहुएण वि एण विहोएं जं न दिटु सुहि बंधवलोएं। जं सुहु असणेहिं रच्चंतए जं सुह अंधारइ नच्चंतए। जं सुहु सिविणंतर पिच्छंतए तं सुहु एत्थु नयरि अच्छंतह । तो वरि एवहिं एउ पउंजहं लहु महग्घमणिरयणइं पुंजहं । बिपिणवि वारवार उत्थल्लहं सायरतीरि वहेविणु घल्लहं।
जो तहिं सत्थवाहि को एसइ सो अम्हहं नियनयरहो नेसइ । घत्ता। जंपविणु ताए चलवावारि परिट्ठियई।
भंडारइं लेवि रयणपुंज पुंजई कियई ॥ १५ ॥ चंदप्पहु जिणवरु जय कारिवि सुदिढ निविड वासणई समारिवि । देवितूल मणिरयणहं भरियउ संवाहिवि घरपंगणि धरियउ । चलियई बेवि लेवि नियखंधिं नीसरियई तहो विवरहो रंधिं । पुणुवि तित्थु अइमुत्तातंडवि किउ आवासु विउलि लयमंडवि । तं मिल्लिवि पुणरवि संचल्लइ दिणि दिणि वारंवार उत्थल्लई। पयफंसिं परिमलिय वसुंधर तं जि विणोउ जाउ तें वासर । संवाहियइं अणेयपयारइं बहुमणिरयणकणयभंडारई । चेलियाई णाणाविहवन्नई जाइजाइ लोयणहं रवन्नई।
बहुअन्नन्ननामगुणवेयइं नवकुंकुमकणिसारुणतेयई । घत्ता । घणसारजुआई मयपरिमलहरियंदणइं।।
उव्वहिवि कयाइं पुंजई नयणाणंदिरई ॥ १६ ॥ मणिकेऊरकडयकडिसुत्तई मणिकंचुअई रयणपज्जुतई ।
