________________
चउत्यो सन्धी कहिंचिप्पएसे समुण्णोण्णघोसो हुओ पायडो वंसयाले हुयासो।'
कहिंचि पएसे मऊरं पमत्तं णडतं पि अप्पाणयं विष्णडतं । घत्ता । अवियलचित्तु मुणेवि गय एम सुइरु हिंडंतु थि।
अइमुत्तयमंडइदुमहो तलि वियडसिलायलि वीसमिउं ॥३॥ करचरण धुएवि वरकुसुम लेवि जिणु सुमरिवि पुप्फंजलि खिवेवि । फासुयसुयंधरसपरिमलाई अहिलसिवि असेसई तरहलाई। थिउ वीसवंतु खणु इक्कु जाम दिणमणि अत्थवणहु ढुकु ताम । हुअ संझतेयतंबिरसराय रत्तंबरु णं पंगुरिवि आय । पहि पहिय थक्क विहडिय रहंग णियणियआवासहो गय विहंग । मालियरविंद वम्महु वितट्ट उप्पन्न बालमिहुणहं मरह। परिगलिय संझ तं णिएवि राइ असइ व संकेयहो चुक्क णाइ । हुअ कसण सवत्ति व मच्छरेण सिरि पहय णाई मसिखप्परेण । हुअ रयणि बहलकजलसमील जगु गिलिविणाई थिय विसमसील। अवरुप्परु पयडंतेहि गुज्झु मिहुणहि पारंभिउ सुरयजुज्झु।। एहइ पडिवण्णि करालि कालि गहभूअजक्खरक्खसवमालि।
वणि विसमि विएसि विचित्त पत्तु तह वि हु अकंपु कमलसिरिपुत्तु । घत्ता । परमिट्टि पंच हियवइ धरेवि दुविहें पच्चक्खाणु किउ ।
अहियरिवि मंत्तु सत्तक्खरउ परमप्पउ झायंतु थिउ ॥ ४ ॥ परिगलिय रयणि पयडिउ विहाणु णं पुणु वि गवेसउ आउ भाणु । जिणु संभरंतु संचलिउ धीरु वणि हिंडइ रोमंचियसरीरु । सुणिमित्तई जायई तासु ताम गयपयहिणंति उड्डेवि साम । वामंगि सुत्ति रुहुरुहइ वाउ पियमेलावउ कुलुकुलइ काउ । वामउ किलिकिंचिउ लावएण दाहिणउं अंगु दरिसिउ मएण । दाहिणु लोयणु फंदइ सबाहु णं भणई एण मग्गेण जाहु। थोवंतरि दिहु पुराण पंथु भविएण वि णं जिणसमयगंथु । सप्पुरिसु वियप्पइ एण होमि विजाहर सुर ण च्छिवंति भूमि । णउ जक्खहं रक्खहं किण्णराहं लइ इत्थु आसि संचरु णराहं । संचल्लिउ तेण पहेण जाम गिरिकंदरि सो वि पइटु ताम । चिंतवइ धीरु सुंडीरु वीरु लइ को वि एउ भक्खउ सरीरु । पइसरमि एण विवरंतरेण निविडउ कज्जु कि वित्थरेण ।
