________________
भविसयत्तकहाए
चंदप्पहु जिणु हियवइ धरिवि जासु पहाविं विमलमइ । पुणु कहमि जेम भविसत्तु णरु तिलयदीवि लाहउ लहइ॥ अहो जिणु अंचहु मं पर वंचहु इंदिय खंचहु सुक्किउ संचहु । बंधुयत्तु कुलकित्तिविणासु गउ वोहित्थई लेवि हयासु । भविसु विसरि करचलण धुएवि जाम एइ वरकमलइ लेवि । ताम ण कोइवि पिक्खइ तित्थु विभिउ मणि अमुणियकजत्थु । सुण्णउं तं पएसु ण सुहाइ कमलई मिल्लिवि उम्मुहुं धावइ । पिक्खइ ताम समुद्दि वहंतइ धुयधयवडई ताई जलजंतई। दुक्खहो भरिउ हियइ आहल्लिवि गउ खलु बंधुयत्तु मई मिल्लिवि। करु महियलि हणेवि उरि कंपिउ ण चलिउ जं चिरु जणणिए जंपिउ ।
ण कज्जु कहिं अब्भुद्धरणउं वणि असमाहिए आयउ मरणउं। पत्ता । अण्णण्णइं चिंतिजंति मणि खलविहि अण्णण्णई सरइ ।
सुह वि वियड्ड गुणसयभरिउ दइउ परम्मुहुं किं करइ ॥१॥ हा हय पावकम्म मइवन्जिय किउ अजुत्तु हयबुडि अलज्जिय। णियकुलमग्गु भग्गु जसु हारिउ दुजणजणि जंपणउं सम्बारिउ । कवडु करिवि जं परु वंचिजइ आएं गुणवंतहं लजिज्जा। एत्तिउ दुक्खु मज्झु निकारणु कुलहो कलंकु जाउ जं दारुणु । गयउरि अयसपडहु वजाविउ तायहोतणउं गाउं लज्जाविउ । अह इत्थु वि ण विसाउ करिव्वउ मं च्छुड एण एम होइव्वउ । जइ तं तेम घडिउ तं तेणइ तो किर काइं विसरिय एणइ । एउ चिंतंतु विसाएं मिलिउ विहुणिवि बाहुदंड संचल्लिउ ।
इउ वणु इउ सरीरु धम्मद्धउ करि खलविहि जं पई पारडउ । घत्ता। चिंतंतु एम उब्भडवयणु दूरविसज्जियमरणभउ ।
संचलिउ सम्मुहु वणकाणणहो णं मुक्कं कुसुमत्त गउ ॥२॥ पइटो वणिंदो वणे तम्मि काले पहिट्ठो तहिं दुणिरिक्खे खयाले। दिसामंडलं जत्थ णाउं अलक्खं पहायं पि जाणिजए जम्मि दुक्खं । भमंतो विभीसावणं तं वणं सो णियच्छेइ दुप्पिच्छराई सरोसो। कहिंचिप्पएसे सजूहं गयंदं महालीलकल्लोलगंडं सणिदं । कहिचिप्पएसेणिएउंगरिदं ण णढ ण रुटुं सदप्पं मइंदं । काहींचप्पएसे घणं कजलाई गर्य भुडिणीसावराहं वराहं ।
