________________
અનુયાયીઓ પણ સહેલાઈથી સમજી શકતા નથી, ત્યારે અહીં તો એક અજૈન જ નહીં પણ જે ખુન્નસવાળી જાત ગણાય તે વંશનો સમ્રાટ અકબર-હિંસા કે અહિંસાની દરકાર ન કરનાર ! તેની સાથે આચાર્ય ભગવંતે કરેલી ચર્ચાનું પરિણામ તો જુઓ ! એ સમયે જ તેણે પર્યુષણ પર્વ દરમિયાન આગ્રામાં હિંસા ન કરવાનું ફરમાન બહાર પાડ્યું. પાછળથી આ ફરમાન ગુજરાત ઉપરાંત સૌરાષ્ટ્ર, દિલ્હી, માળવા, લાહોર વગેરે સ્થળોએ પણ લાગુ પાડ્યું. અકબર જેવા મહાન સમ્રાટને ખાતરી થઈ ગઈ. શ્રી હીરવિજયસૂરિજી એક અસાધારણ વિદ્ધતા ધરાવનાર સાધુ છે, જેની માટે સમગ્ર જગત પોતાનું છે. આ કારણે તેમને “જગદ્ગુરુ'નું બિરુદ આપવામાં આવ્યું.
અહિંસાના હિમાયતી આચાર્ય શ્રી હીરવિજયસૂરિજીના શિષ્યો પણ એમના જ પાવન પગલે પ્રયાણ કરનારા હતા. અકબરના આગ્રહને માન આપી આચાર્યશ્રીએ તેમના શિષ્ય શાંતિચંદ્રજીને અકબરના રાજ્યમાં રાખ્યા. તેમણે પણ પ્રસંગોપાત બાદશાહને અહિંસાપાલન માટે આગ્રહ રાખ્યો. વિશેષ સિદ્ધિ તો એ હતી કે બાદશાહના જન્મ દિવસ અને ઈદના તહેવાર નિમિત્તે તો માંસાહાર વિશેષ થાય, એને બદલે એ દિવસોમાં પણ સમ્રાટે હિંસા પર પ્રતિબંધ મૂકતાં ફરમાન બહાર પાડ્યાં.
એક વિશેષ સિદ્ધિ : મોરનાં પીંછાં સુંદર હોવાથી એનું રૂપ ગમે તેવું છે. પરંતુ કલગી વગર તે રૂપ અધૂરું લાગે છે. શ્રી કૃષ્ણના હાથમાં બંસરી છે પરંતુ માથા પરનું મોરપિંછ તેના વ્યક્તિત્વને સુંદરતમ બનાવે છે. આ તો રહ્યો બાહ્ય દેખાવ, પરંતુ આત્માની સુંદરતમ સ્થિતિ તો સદ્દગુણોના સિંચનથી અને તેમાંથી પ્રગટતી સુગંધથી થાય છે. અકબર ધીમે ધીમે અહિંસાના પંથે આગળ વધી રહ્યો હતો. આ સમયે લોકો પાસેથી “જીજીયાવેરો” લેવામાં આવતો.
