________________
ચોમાસામાં ગાડા અને બળદો મારફત ભાર વહન ન જ કરાવવું અને પ્રાયઃ પ્રાણીઓની હિંસાને કરનાર એવી ખેતી કરવી નહિ.. ૩૧ વ્યાજબી ભાવ મળે વસ્તુઓ વેચવી પણ તેથી અધિક લોભ રાખવો નહિ કારણ ઘણું ઉપજાવનારને પ્રાયઃ સમૂળગું જ નાશ પામે છે. ૩૨
ઘણો લાભ થતો હોય તો પણ ઉધાર માલ વેચવો નહિ, ઘરેણાં રાખ્યા વિના લોભને વશ થઈ ખરેખર ધન વ્યાજે આપવું નહિ. ૩૩
ધર્મના મર્મને જાણનારે ચોરીને લાવેલું છે, એમ જાણ્યા પછી ગ્રહણ કરવું નહિ. વિવેકીએ ભેળસેળ વિ. ખરાબ કામો છોડી દેવા જોઈએ. ૩૪
દાણચોરો સાથે, ચંડાળો સાથે, ધૂર્ત લોકો સાથે તેમજ હલકા લોકો સાથે આ ભવમાં અને પરભવમાં હિતની ઇચ્છાવાળાએ વ્યવહાર કરવો નહિ. ૩૫
વિચારકે વસ્તુ વેચતાં ખોટું બોલવું નહિ અને બીજાની વસ્તુ રાખતા થાપણ ઓળવવી નહિ. ૩૬
વસ્તુ જોયા વિના બુદ્ધિમાન પુરુષ એનો સોદો પાકો ન કરે અને સોનું, ઝવેરાત વિગેરે તો પ્રાયઃ પરીક્ષા કર્યા વિના ગ્રહણ કરવા નહિ. ૩૭
રાજાના પ્રભાવ વિના અનર્થ અને આપત્તિઓનું નિવારણ ન થાય માટે રાજાને અનુસરીને રહેવું, છતાં પરવશતા કરવી નહિ. ૩૮
બુધ (પંડિત) પુરુષે-તપસ્વી, કવિ, વૈદ્ય (ચિકિત્સક), મર્મનો જાણ, રસોઈઓ, માંત્રિક અને પોતાને સદૈવ પૂજા કરવા યોગ્ય એવા પૂજ્ય વડીલોને ક્યારેય ગુસ્સે ન કરવા. ૩૯
અર્થોપાર્જન કરવામાં તત્પર બનેલા પુરુષે ઘણો ક્લેશ થાય તેવી પ્રવૃત્તિ, ધર્મનું અતિક્રમણ, નીચ પુરુષોની સેવા અને, વિશ્વાસઘાત નહિ કરવો. ૪૦
