________________
જ આવી તક ગરાસિયાઓના ઘરઆંગણે જાણે સામેથી ચાલીને આવી.
રા' ગ્રાહરિયાની સોમેશ્વરના દર્શનાર્થે જવાની ભાવના હતી, આ માટે એમણે મનમાં માનતા માની હતી. પણ સંજોગો જ એવા સરજાતા હતા કે, યાત્રાની એ ભાવના હજી ભાવના જ રહી હતી. એથી એક દિ' તો એમણે નક્કી જ કરી નાંખ્યું કે, હવે તો રાજ્યની બધી જ ચિંતાથી મુક્ત થઈને ગુપ્તવેશે યાત્રા માટે નીકળી પડવું. ગુપ્તવેશે નીકળવાનું કારણ એ જ હતું કે, યાત્રાને એઓ યાત્રાની રીતે કરવા માંગતા હતા. એઓ પરાક્રમી હોવાથી સોમેશ્વર પહોંચતા સુધી રસ્તામાં કોઈ આક્રમણ આવી પડે, તો એને એઓ એકલપંડે જરૂર હંફાવીહરાવી શકે એમ હતા. પરંતુ યાત્રા વચ્ચે યુદ્ધ ખેલીને યાત્રાને તેઓ કલંકિત બનાવવા માંગતા નહોતા. એથી યુદ્ધ ન કરવું પડે અને યાત્રા બરાબર થઈ શકે, એવા એક ઉપાય રૂપે ગુપ્તવેશે યાત્રા કરવી, એ હિતાવહ જણાતા એમણે એક દહાડો વેશ-પરિવર્તન કરીને યાત્રા કાજે પ્રયાણ કર્યું.
રા' ગ્રાહરિયાની એ યાત્રા થોડા દિવસો સુધી તો ગુપ્તતા જાળવી શકી, પણ આવા રાજવી ક્યાં સુધી ગુપ્ત રહી શકે ? ચોરવાડ પ્રદેશમાં થઈને જ એ ગુપ્તયાત્રા આગળ વધવાની હતી, એથી એની ગંધ આવી જતાં એ પ્રદેશના ગરાસિયાઓ સજાગ-સાવધાન બની ગયા. અને એક દહાડો ભરજંગલમાં જ ઓચિંતો હુમલો કરીને એમણે રાજવીના ગુપ્તકાફલાને અટકી જવાની ફરજ પાડી. ગુપ્ત-વેશમાં છુપાયેલા રાજવી તો નિશ્ચિંત બનીને સોમેશ્વરની દિશામાં આગળ વધી રહ્યા હતા. પણ પોતાના કાફલાની સામે જે રીતે પડકાર થયો, એથી એમને એવી શંકા તો થઈ જ ગઈ કે, આ હુમલો ગરાસદારોનો જ હોવો જોઈએ અને પોતે રાજવી હોય, એવી ગંધ હુમલાખોરોને આવી જ ગઈ હોવી જોઈએ.
રાજવીએ જોયું કે, આસપાસ નેસ અને થોડાં ઝૂંપડાં સિવાય કોઈ બચાવે એમ નહોતું. એથી જીવ બચાવવા એમણે પોકાર પાડ્યો :
-
સંસ્કૃતિની રસધાર ભાગ-૨
૬
