Page Text
________________
એકતા પર જોર આપ્યું. વસ્તુતઃ ભગવાન મહાવીરનો પંથ એક જ છે થોડા ક્રિયાકાંડને લઈ બે ફાંટા પડ્યા છે, મૂળ માન્યતામાં જરા પણ ભેદ નથી, ઇત્યાદિ સિદ્ધાંતો સમજાવ્યા. વાતાવરણ ઘણું જ ભાવસભર બની ગયું. મુનિશ્રી જૈન મંદિરમાં પણ દર્શન માટે પધાર્યા. દેરાવાસીભાઈનો પ્રશ્ન અને સમાધાનઃ
એક દેરાવાસીભાઈએ પ્રશ્ન કર્યો, “શું તમે મૂર્તિનો વિરોધ કરો છો ? શું તમે મૂર્તિને ભગવાન નથી માનતા ?”
જયંતમુનિજીએ સમાધાન આપતાં કહ્યું, “અમે મૂર્તિનો કોઈ વિરોધ નથી કરતા. અમે મૂર્તિને મૂર્તિ રૂપે માનીએ છીએ, ભગવાન રૂપે નહીં. મૂર્તિ ભગવાનની સ્થાપનાનિક્ષેપ છે, તે ભાવનિક્ષેપ નથી. એટલે મૂર્તિપૂજામાં જે આરંભ-સમારંભ થાય છે અને ફૂલ આદિમાં જે સાવદ્ય ક્રિયા છે તેને અમે યોગ્ય નથી માનતા. મૂર્તિની જો ભાવપૂજા કરવામાં આવે તો અમને તેનો જરા પણ વાંધો નથી. મૂર્તિની જો કોઈ નિરવદ્ય પૂજા કરે તો તેમાં અમને જરા પણ કષ્ટ નથી.
દિગંબર ભાઈઓએ ફૂલ તોડવાનું બંધ કરીને થોડો સુધારો કર્યો છે. તેઓ ચોખાના દાણાને પીળો રંગ ચડાવીને તેને ફૂલ રૂપે મૂર્તિને ચડાવે છે. તેઓએ તેટલા પ્રમાણમાં હિંસા ઓછી કરી છે. હજુ આગળ વધે તો સંપૂર્ણ નિર્દોષ પૂજા થઈ શકે છે . | મુનિશ્રીના ઉત્તરથી પેલા ભાઈને સંતોષ થયો અને આટલી સૂક્ષ્મ પાતળી રેખાનું પ્રરૂપણ કરવાથી તેમને ઘણો જ હર્ષ થયો. પ્રવચન પછી શ્રી જયંતમુનિજી બધાં ઓશવાળ ઘરોમાં પગલાં કરવા માટે પધાર્યા અને બીબીજીને ત્યાં પણ લાભ આપ્યો. ચોરડિયા પરિવાર સાથે ભક્તિસંબંધ બંધાયો તે આજ સુધી ચાલુ છે. તે પરિવારના પુત્ર ધર્મેન્દ્રકુમાર જૈન હાલ બોકારો રહે છે, અત્યંત ધનાઢ્ય છે અને પૂજ્ય ગુરુદેવની સેવામાં સદા તત્પર રહે છે.
ઝૂમરી તિલૈયાથી એક દિવસ ચંદ્રવારા અબરખના કારખાનામાં મુકામ કરી ૧૯૫૧ની ૨૯મી ડિસેમ્બરે બહરીચટી પધાર્યા. બહરી જી. ટી. રોડ ઉપર આવેલું રોડ જંકશન છે. અહીં પટનાનો મેઇન રોડ જી. ટી. રોડને મળે છે. બંને રસ્તા ખૂબ મોટા હોવાથી બહરીનું ઘણું મહત્ત્વ વધી ગયું છે. જી. ટી. રોડ પરથી હજારો ગાડીઓ પસાર થાય છે, તેથી બહરી મુસાફરો અને ડ્રાઇવરોના ભોજન અને વિશ્રામ માટેનું મોટું કેન્દ્ર બન્યું છે. આ ક્ષેત્ર વાહનોની અવરજવરથી સતત ધમધમતું હોય છે.
મુનિરાજો બહરીમાં પણ ઘણી સાતા પામ્યા. બહરીથી બરકાઠા અને બગોદર થઈ ડુમરી જવાનું હતું. ડુમરી ગામે પહોંચતાં જી. ટી. રોડ છોડીને મધુવન (સમેતશિખર) જવાનું હતું.
બરકઠામાં ઠંડા પાણીનો રામકુંડ અને ગરમ પાણીનો લક્ષ્મણકુંડ સુપ્રસિદ્ધ છે. અહીંના કુંડની વિશેષતા એ છે કે એક માઈલ દૂરથી પણ કુંડમાંથી નીકળતા વરાળના ગોટા જોઈ શકાય છે.
સમેતશિખર તરફ પ્રયાણ ] 199
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |