Page Text
________________
બી. બી. હટિયા એ કાશીની શાકભાજી બજારની સાથે જોડાયેલી એક વિશેષ ગલી છે. ત્યાં મોહનભાઈ ગોટાવાળાનું મકાન છે. શ્રીસંઘે મુનિઓની ત્યાં ઉતારવાની વ્યવસ્થા કરી હતી. મોહનભાઈ ગોટાવાળાને ભગવાન માટેના શણગારનાં સાધનો અને સોના-ચાંદીના અલંકારો બનાવવાનું કામ હતું. તેથી આ પરિવાર ગોટાવાળો કહેવાતો હતો. ગોટાવાળાના જે મકાનમાં મુનિજી ઊતર્યા હતા તે મકાન ઝઘડાનું ઘર હતું. મોહનભાઈ ગોટાવાળાનું શરૂઆતના દિવસોનું વર્તન અપ્રિય હતું. એટલે કાશીમાં આવતાં જ “પ્રથમ ગ્રાસે મક્ષિકા જેવો અણગમતો અનુભવ થયો.
મોહનભાઈ તથા તેના ભત્રીજાને આ મકાન માટે એકબીજાથી ક્લેશ હતો. ભત્રીજો મુંબઈ રહેતો હતો, જ્યારે મોહનભાઈનો પરિવાર બી. બી. હટિયાના મકાનની એકદમ પાસે રહેતો હતો. આ મકાનના ૩-૪ રૂમ ભત્રીજાના હાથમાં હતા અને એક રૂમ કાકાના તાબામાં હતો. એ રૂમમાં મોહનભાઈનો સુપુત્ર સખીચંદ ચાંદી પર સોનાનો ગિલેટ ચડાવવાનું કામ કરતો હતો. તે માટે રૂમમાં પાણી અને કેમિકલથી ભરેલાં મોટાં ટબ ગોઠવેલાં હતાં. આ બધું કામ ઇલેક્ટ્રિસિટીથી થતું હતું.
આત્મારામભાઈ ભત્રીજાના મિત્ર હતા. તેમણે મિત્રના નાતે મુંબઈ રહેતા ભત્રીજા પાસેથી ચાવીઓ મંગાવી લધી હતી. ભત્રીજાવાળા ૩ રૂમ, આંગણું, ઓસરી, વગેરેમાં મુનિજીના ઊતરવા માટે શ્રીસંઘે વ્યવસ્થા કરી હતી. મુનિજી પધાર્યા તેની સાથે જ, બીજા દિવસના સવારથી મોહનલાલે વિરોધ શરૂ કર્યો. તે મુનિઓને ભાંડવા પણ લાગ્યો. આત્મારામભાઈ કહી ગયા હતા કે આપણે જરા પણ ગભરાવાનું નથી. મોહન બોલ બોલ કરતો રહેશે. પૂ. તપસ્વીજી મહારાજ અને શ્રી જયંતમુનિએ સમતાભાવે શાંતિ જાળવી રાખી. ઝઘડો કરવો એ મોહનલાલનો નિત્યક્રમ થઈ ગયો.
મોહનલાલ દરરોજ સવારના આંગણામાં આવે, અડધો કલાક જેમતેમ બોલી, ત્યાંના બાથરૂમમાં સ્નાન કરી, પોતાનો ટુવાલ તાર પર સૂકવીને ચાલ્યો જાય. આ ક્રમ ચાર-પાંચ દિવસ સુધી ચાલ્યો. ત્યાં ભગવાને એવી લીલા કરી કે “ઘીના ઠામમાં ઘી પડી ગયું.” ક્યારેક સંઘર્ષ સુપરિણામદાયી અને સુખદાયી પણ હોય છે. આજે સવારના સખીચંદ પોતાનું કામ કરીને ગયો ત્યારે સ્વિચ બંધ કરતા ભૂલી ગયો. તેણે વાયરનું પ્લગ અને સૉકેટથી જોડાણ કર્યું ન હતું, પણ ઉઘાડા ખુલ્લા તારથી સ્વિચ સાથે જોડાણ આપ્યું હતું. ૪૪૦નું વોલ્ટનું કનેક્શન હતું. સ્વિચ ચાલુ હોય ત્યારે તારમાં ઇલેક્ટ્રિસિટીનો પ્રવાહ પૂર જોશમાં હોય.
સવારના પહોરમાં મોહન આવ્યો. તેણે ભાંડવાનું શરૂ કર્યું અને પછી સ્નાન કરવા ગયો. સ્નાન કરીને તે ભીનો ટુવાલ સૂકવવા માટે તાર તરફ આગળ વધ્યો. જેવો ભીનો ટુવાલ તાર પર નાખ્યો કે મોહનલાલ તારમાં ચોંટી ગયો. તેણે જોરથી ચીસ પાડી. મરે એટલી જ વાર હતી. કુદરતને કરવું કે શ્રી જયંતમુનિજી એ સમયે સ્વિચ પાસે ઊભા હતા. મુનિજીએ સમયસૂચકતા
સાધુતાનું શિખર અને માનવતાની મહેંક 1 142
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |