Page Text
________________
આ દરમિયાન માનપાડાના સંઘની વિનંતીથી મુનિશ્રી એક સપ્તાહ માટે તેમના ઉપાશ્રયમાં ગયા. ત્યાંથી મુનિશ્રી બેલતગંજ પધાર્યા. આગ્રામાં સૌથી વધુ જોવાલાયક તાજમહાલ છે. સંઘના ભાઈઓએ મુનિશ્રીને તાજમહાલ દેખાડવાનો ખાસ કાર્યક્રમ રાખ્યો.
મોગલકાળની આ ઐતિહાસિક કલાકૃતિ જોઈને માણસનું મન પ્રસન્ન થઈ જાય છે. નરી આંખે જોતા જ રહો, તો પણ સંતોષ થતો નથી. પ્રતિદિન સેંકડો અને હજારોની સંખ્યામાં માણસો તાજ જોવા આવે છે. આગ્રાના તાજનું કરોડો માણસોએ નિરીક્ષણ કર્યું હશે. તાજ એ મુમતાજનો તાજ છે !
અહીં એવી માન્યતા છે કે વરસાદનું એક ટીપું તાજના ગુંબજના કોઈ સ્થળેથી ટપકીને મુમતાજના કપાળ પર પડે છે. અત્યાર સુધી કોઈ એન્જિનિયરો આ બારીક છિદ્ર જાણી શક્યા નથી. જયંતમુનિજી આ માન્યતાથી વાકેફ હતા.
ચોમાસાની સીઝન હતી. બરાબર એ જ વખતે ધોધમાર વરસાદ આવ્યો. જયંતમુનિજીએ મુમતાજની દરગાહ સુધી જઈ બારીકાઈથી નિરીક્ષણ કર્યું, પરંતુ તેમને પાણીનું એક પણ ટીપું પડતું દેખાયું નહિ. ખરેખર, આવાં ઐતિહાસિક સ્થળો સાથે ઘણી માન્યતાઓ જોડાઈ જાય છે અને તે એક આશ્ચર્યજનક ઘટના તરીકે વર્ણવાય છે. જ્યારે હકીકતમાં એવું કશું હોતું નથી. મુનિશ્રીને પણ એવો જ અનુભવ થયો. છતાં કોઈને સાચો અનુભવ થતો હોય તો તે પ્રભુગમ્ય છે.
તાજ સિવાય આગ્રાનાં જોવાલાયક નાનાંમોટાં ઘણાં સ્થળોનું મુનિશ્રીએ નિરીક્ષણ કર્યું. દયાલબાગની અદભુત હવેલી :
રાધાસ્વામી પંથના દયાલબાગ તથા સ્વામીબાગ આગ્રામાં પોતાનું વિશિષ્ટ સ્થાન ધરાવે છે. દયાલબાગના સ્વામીઓએ લગભગ દોઢસો વરસ પહેલાં રાધાસ્વામી પંથની સ્થાપના કરી હતી. ત્યારબાદ સ્વામીઓના મનમાં તાજમહાલથી પણ ચડી જાય એવી વિશેષ કલાકૃતિનું નિર્માણ કરવાની ભાવના થઈ. તેમણે નવ માળની અલૌકિક, વિશિષ્ટ, પૂરા મારબલની એક હવેલી બનાવવાની યોજના ધડી. તેમાં ભિન્નભિન્ન રૂપે ભગવાન શ્રીકૃષ્ણનાં રૂપો સ્થાપી, વિશ્વવિખ્યાત સ્થાન ઊભું કરવાનું ધાર્યું હતું. આખું સ્થાન બનતાં નવસો વર્ષ લાગે તેવી યોજના છે. આ નિર્માણને દોઢસો વર્ષ થઈ ચૂક્યાં હતાં. લાખો-કરોડોના ખર્ચે આ હવેલી તૈયાર થઈ રહી છે. હવેલીની વિશેષતા એ છે કે એક એક મારબલનો પથ્થર તૈયાર થતાં બબ્બે ચાર-ચાર વરસ લાગી જાય છે. ઉદાહરણરૂપે, તાજની કલાકૃતિમાં અંગુરની લતા આરસના ચોસલા પર ખોદેલી છે અને તેમાં રંગીન આરસની પતરીઓ જડવામાં આવી છે.
ઉત્તરપ્રદેશની અનુભવયાત્રા 0 119
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |