Page Text
________________
આકાશનાં ચક્ર પૂરાં કરે છે. પરંતુ ખરા ગ્રહો તો મનુષ્યના શુભાશુભમાં છે. ગ્રહો તો જીવનનું એક ગણિત છે. આ ગણિતથી હકીકત જાણી શકાય છે. ગ્રહ સુખ-દુ:ખ આપતા નથી, પણ કેવાં સુખ-દુ:ખ આવવાનાં છે તેની સૂચના આપી જાય છે. તે એક પ્રકારના માઈલસ્ટોન છે. ગ્રહોને વધારે સમજવા કરતાં મનુષ્ય પોતાના કર્મ સુધારે તો ગ્રહો સ્વયં સુધરી જાય છે. યાદ રાખવું ઘટે કે ગ્રહગતિ પણ કર્માધીન છે.
આજે ખરેખર શુભ ગ્રહનો ઉદય જાગ્યો હોય તેમ લાગતું હતું. પ્રાત:કાળે મુનિવર પ્રતિક્રમણ આદિ ધાર્મિક ક્રિયાઓથી પરવાર્યા. સૂર્યોદય થતાં જ શેઠ અચલસિંહજી ગોચરી માટે પ્રાર્થના કરી ગયા હતા. તેમનું માતૃહૃદય સંવેદનયુક્ત હતું કે મુનિઓ આહાર કર્યા વિના સૂતા છે. શ્રાવકોને ભગવાને “અમ્મા-પિયા' કહ્યા છે તે આનું નામ. જુઓ, શેઠ અચલસિંહજી સાધુ-સંતોના પિતા જેવા હતા. થોડી વારમાં આહાર-પાણી તૈયાર થતાં ફરીથી પ્રાર્થના કરી. ભાવપૂર્વક પોતાના હાથે બધી ગોચરી વહોરાવી ત્યારે તેના મુખમંડળ પર આનંદની આભા છવાઈ ગઈ. આજે પૂ. તપસ્વી મહારાજે પોતે જ પાત્રા લીધા હતા. જોકે તપસ્વી મહારાજને તો નવ વાગ્યા પહેલાં કશું કલ્પતું નહીં. કાયમના પોરસીના પચ્ચખાણ હતા. પરંતુ ત્યાં પણ એક પિતૃહૃદય હતું. એક શ્રાવક પિતા હતા અને એક મુનિ પિતા હતા. બન્ને પિતૃભાવનું ભાન જયંતમુનિજી હતા. આથી વધારે મોટો શુભગ્રહ શું હોય !
લોહામંડીનાં શ્રાવક-શ્રાવિકાઓ ઊભરાવા લાગ્યાં. શેઠ રતનલાલજી, ઉદયચંદજી, કસ્તુરચંદજી, સીતાચંદજી, સંપતલાલ યાદવરાય, ટોપીવાળા મૂલચંદજી, પારસમલજી, મોતી કટારવાલા, માસ્તર કનૈયાલાલજી, જગન્નાથ ચેનસુખજી, લાલા કનૈયાલાલજી, વગેરે ધર્મપ્રેમી બંધુઓ સંઘમાં વિશેષ રૂપે ભાગ લેતા હતા. એ સૌ આવી પહોંચ્યા. શ્રાવિકાઓ પણ ભક્તિભાવથી ઊભરાતી હતી.
શેઠ અચલસિંહજી સૌનું સ્વાગત કરી રહ્યા હતા. તેમણે આટલી બધી તૈયારી ક્યારે કરી તે ખબર ન પડી. જેમ જેમ શ્રાવકો આવતા ગયા તેમ તેમ સૌને અલ્પાહારની પ્લેટ ધરવામાં આવતી હતી. પ્લેટમાં પેઠા, દાલમૂઠ, ગરમ પૂરી અને કાબુલી ચણા પીરસવામાં આવતા હતા. પોતે સ્વયં દરેકને પ્લેટ પીરસી રહ્યા હતા. આ દૃશ્ય જોઈ પૂ. તપસ્વી મહારાજ ખૂબ ખુશ થઈ ગયા. દરેક બાળકો, વડીલો, યુવાનો નાસ્તો લઈ વિહારમાં ચાલવા માટે તૈયાર થઈ ગયાં હતાં.
મુનિઓએ ભેટ બાંધી. શેઠ અચલસિંહજી સ્વયં વિહારમાં સાથે જ ચાલ્યા. આગ્રામાં આટલો પ્રેમ જાગ્રત છે તેનો અદ્ભુત અનુભવ થયો. આગ્રાનાં શ્રાવક-શ્રાવિકાઓ આટલાં બધાં ભક્તિભાવ અને સુસંપન્ન છે તે મુનિશ્રીની કલ્પનાથી બહાર હતું. આગ્રા સંઘ શું છે તે ખબર જ ન હતી. આ તો જાણે ખારા સમંદર વચ્ચે મીઠી ગંગા મળી ગઈ !
ઉત્તરપ્રદેશની અનુભવયાત્રા 0 113
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |