________________
[२१४} से भिक्खू वा तहेव गंतुमुजाणाई पव्वयाइं वणाणि वा रुक्खा महल्ले पेहाए नो एवं वइज्जा, तं०-पासायजोग्गाति वा तोरणजोग्गाइ वा गिहजोग्गाइ वा फलिहजो० अग्गलजो० नावाजो० उदग० दोणजो० पीढचंगबेरनंगलकुलियजंतलट्ठीनाभिगंडीआसणजो० सयणजाणउवस्सयजोगाई वा, एयप्पगारं० नो भासिज्जा ।। से भिक्खु वा० तहेव गंतु० एवं वइज्जा, तंजहा-जाइमंता इ वा दीहवट्टा इ वा महालया इ वा पयायसाला इ वा विडिमसाला इ वा पासाइया इ वा जाव पडिरूवाति वा एयप्पगारं भासं असावज्जं जाव भासिजा ॥ से भि० बहुसंभूया वणफला पेहाए तहावि ते नो एवं वइज्जा, तंजहापक्का इ वा पायखजा इ वा वेलोइया इ वा टाला इ वा वेहिया इवा, एयप्पगारं भासं सावज्जं जाव नो भासिजा ॥ से भिक्खू० बहुसंभूया वणफला अंबा पेहाए एवं वइजा, तं०-असंथडा इ वा बहुनिवट्टिमफला इ वा बहुसंभूया इ वा मृयरुचित्ति वा, एयप्पगारं भा० असा० । से० बहुसंभूया
ओसही पेहाए तहावि ताओ न एवं वइजा, तंजहा-पक्का इ वा नीलीया इ वा छवीइया इ वा लाइमा इ वा भज्जिमा इ वा बहुखजा इ वा, एयप्पगा० नो भासिजा ॥ से० बहु० पेहाए तहावि एवं वइज्जा, तं०-रुढा इ वा बहुसंभूया इ वा थिरा इ वा ऊसढा इ वा गब्भिया इवा पसूया इवा ससारा इ वा, एयप्पगारं भासं असावज्जं जाव भासि० ॥ ( सू० १३८)
