________________
तओ चक्की पयंपेइ, दंसेमि दुग्गमुच्चयं । दुट्ठाणं तेसं नामं पि, जत्थ न नज्जए वि हु ॥३५७।। अत्थेगो पव्वओ उच्चो, अग्गिज्झो धाडिवज्जिओ । न विणा वाहणं तत्थ, सक्कए गमिउं परं ॥३५८।। वाहणं तुरओ अत्थि, वसहा य समुज्जला । तुरगो एगहेलाए, दुग्गे नेउं समत्थओ ॥३५९।। वसहा य न सक्कंति, तत्थ नेउं खणेण य । किं तु विसम्म विसम्म, अद्धभूमि पि जंति ते ॥३६०।। जो लेइ तुरयं सो हु, एगमेव लहेइ तं । गिण्हेइ वसहा जो उ, ते बारस लहेइ सो ॥३६१।। तुरओ वसहा चेय, गिण्हित्ता पोसए उ जो । सो खु जहत्थियं ठाणं, निज्जए तेहिं नन्नहा ॥३६२।। एगं पि सोहणं वत्थु, गहियव्वं ति केहिं वि । गहिओ तुरओ दिन्नो, एक्केक्को चक्कवट्टिणा ॥३६३।। अवरेहिं पुणो एए, बहुय त्ति मईहिं ते । गहीया वसहा पीणा, बारस बारस फुडं ॥३६४॥ चक्किवुत्तेण मग्गेण, तुरए वसहे वि य । अप्परक्खाइ लोहेण, पालंति पोसयंति य ॥३६५।। वाहणिज्जा अमी निच्चं, जह हुंति निरोगया । पसंसणिज्जा एएसिं, नन्नहा लब्भए गई ॥३६६।। ईय ते निच्चमारूढा, हएसु वसहेसु य । हिंडंति जत्थ तत्थेव, भीया धाडीइ सव्वओ ॥३६७।। सावहाणो इमो लोओ, नियरक्खाइ वच्चए । न छलं लब्भए तस्स, तो न धाडी पडेइ सा ॥३६८॥
कर्मवादविषयिणी देशना ।
३०३
