________________
इसिभासियाई
णासेवेज्जा मुणि गेही एकन्तमणुपस्सतो । कामे कामेमाणा अकामा जन्ति दोग्गतिं ॥२॥ जे लुब्भन्ति कामेसु तिविहं हवति तुच्छ से । अज्झोववण्णा कामेसु बहवे जीवा किलिस्सन्ति ॥३॥ सल्लं कामा, विसं कामा, कामा आसीविसोवमा। बहुसाधारणा कामा, कामा संसारवड्ढणा ॥४॥ पत्थन्ति भावओ कामे जे जीवा मोहमोहिया । दुग्गमे भयसंसारे ते धुवं दुक्खभागिणो ॥५॥ कामसल्लमणुद्धित्ता जन्तवो काममुच्छिया । जरामरणकन्तारे परियत्तन्तवुक्कम ॥६॥ सदेवमाणुसा कामा मए पत्ता सहस्ससो । ण याहं कामभोगेसु तित्तपुवो कयाइ वि ॥७॥ तित्ति कामेसु णासज्ज, पत्तपुव्वं अणन्तसो । दुक्ख बहुविहाकारं कक्कसं परमासुभं ॥८॥ कामाण मग्गणं दुक्खं, तित्ती कामेसु दुल्लभा । पिज्जुज्जोगो परं दुक्खं, तण्हक्खय परं सुहं ॥९॥ कामभोगाभिभूतप्पा वित्थिण्णा वि णराहिवा । फीति कित्ति इमं भोच्चा दोग्गतिं विवसा गया ॥१०॥ काममोहितचित्तेणं विहाराहारकंखिणा । दुग्गमे भयसंसारे परीतं केसभागिणा ॥११॥ अप्पक्कतावराहोऽयं जीवाणं भवसागरो । सेओ जरग्गवाणं वा अवसाणम्मि दुत्तरो ॥१२॥ अप्पक्कतावराहेहिं जीवा पावन्ति वेदणं । अप्पक्कतेहि सल्लेहिं सल्लकारी व वेदणं ॥१३॥ जीवो अप्पोवघाताय पडते मोहमोहितो । बन्धमोग्गरमाले वा गच्चन्तो बहुवारिओ ॥१४॥ असन्भावं पवत्तेन्ति, दीणं भासन्ति वीकवं । कामग्गहाभिभूतप्पा जीवितं पयहन्ति य ॥१५॥ हिंसादाणं पवत्तेन्ति कामसो केति माणवा । वित्तं णाणं सविण्णाणं केयी णेन्ति हि संखयं ॥१६॥ सदेवोरगगन्धव्वं सतिरिक्खं समाणुसं । कामपंजरसंबंद्धं किस्सते विविहं जगं ॥१७॥
