Page Text
________________
नायाधम्मकहाओ
[I.37अम्हेहिं सद्धिं विपुलं पव्वयं सणियं २ दुरूहइ २ सयमेव मेघघणसन्निगासं पुढविसिलं पडिलेहेइ २ भत्तपाणपडियाइक्खिए अणुपुत्वेणं कालगए। ऐस णं देवाणुप्पिया ! मेहस्स अणगारस्स आयारभंडए । . (37) भंते ! त्ति भगवं गोयमे समणं ३ वंदइ नमसइ २ एवं वयासी- एवं खलु देवाणुप्पियाणं अंतेवासी मेहे नामं अणगारे । से णं भंते ! मेहे अणगारे कालमासे कालं किच्चा कहिं गए कहिं उववन्ने ? गोयमा इसमणे ३ भगवं गोयमं एवं वयासी- एवं खलु गोयमा ! मम अंतेवासी मेहे नामं अणगारे पगइभदए जाव विणीए । से णं तहारूवाणं थेराणं अंतिए सामाइयमाइयाई एक्कारस अंगाई अहिज्जइ बारस भिक्खुपडिमाओ गुणरयणसंवच्छरं तवोकम्मं कारणं फासेत्ता जाव किट्टेत्ता मए अब्भणुन्नाए समाणे गोयमाइ थेरे खामेइ तहास्वहिं जाव विपुलं पव्वयं दुरूहइ दब्भसंथारगं संथरइ २ दब्भसंथारोवगए सयमेव पंचमहव्वएं उच्चारेइ बारस वासाइं सामण्णपरियागं पाउणित्ता मासियाए संलेहणाए अप्पाणं झूसित्ता सहिँ भत्ताइं अणसणाए छेदेत्ता आलोइयपडिकते उद्धियसल्ले समाहिपत्ते कालमासे कालं किच्चा उद्धं चांदमसूरगहगणनक्खत्ततारारूवाणं बहूई जोयणाई बहूइं जोयणसयाई बहूई जोयणसहस्साई बहूई जोयणसयसहस्साई बहूइ जोयणकोडीओ बहूइ जोयणकोडाकोडीओ उड्डूं दूर उप्पइत्ता सोहम्मीसाणसणंकुमारमाहिंदबंभलंतगमहासुकसहस्साराणयपाणयारणच्चुए तिण्णि य अट्ठारसुत्तरे गेवेज्जविमाणवाससए वीइवइत्ता विजए महाविमाणे देवत्ताए उववन्ने । तत्थ णं अत्थेगइयाणं देवाणं तेत्तीसं सागरोवमाइं ठिई पन्नत्ता । तत्थ णं मेहस्स वि देवस्स तेत्तीसं सागरोवमाइं ठिई पन्नत्ता । एस णं भंते ! मेहे देवे ताओ देवलोयाओ आउक्खएणं ठिइक्खएणं भवक्खएणं अणंतरं चयं चइत्ता कहिं गच्छिहिइ कहिं उववज्जिहिइ ? गोयमा ! महाविदेहे वासे सिज्झिहिइ बुज्झिहिइ मुञ्चिहिइ परिनिव्वाहिइ सव्वदुक्खाणमंतं काहिइ ।
___एवं खलु जंबू ! समणेणं जाव संपत्तेणं अप्पोपालंभनिमित्तं पढमस्स नायज्झयणस्स अयमढे पन्नत्ते तिबेमि ।
॥ पढमं अज्झयणं समत्तं ॥
| SR No. | 022565 |
| Book Title | Nayadhamma Kahao |
| Original Sutra Author | N/A |
| Author | N V Vaidya |
| Publisher | N V Vaidya |
| Publication Year | 1940 |
| Total Pages | 254 |
| Language | Sanskrit |
| Classification | Book_Devnagari & agam_gyatadharmkatha |
| File Size | 20 MB |