________________
संतं सुद्धपयत्ता, विज्जंतं खकुसुमंव्व न असंतं । मुक्खत्ति पयं तस्स उ, परूवणा मग्गणाईहिं ॥४४॥ गइ इंदिए अ काए, जोए वेए कसाय नाणे अ । संजम दंसण लेसा, भव सम्मे सन्नि आहारे ॥४५॥ नरगइ पणिदि तस भव, सन्नि अहक्खाय खइअ सम्मत्ते । मुक्खोऽणाहार के वल, दंसणनाणे न सेसेसु ॥४६॥ दव्वपमाणे सिद्धाणं, जीवदव्वाणि हुंति ऽणंताणि । लोगस्स असंखिज्जे, भागे इक्को य सव्वेवि ॥४७॥ फुसणा अहिया कालो, इग-सिद्ध पडुच्च साइओणंतो । पडिवायाभावाओ, सिद्धाणं अंतरं नत्थि ॥४८॥ सव्वजियाणमणंते, भागे ते तेसिं दंसणं नाणं । खइए भावे परिणामिए, अ पुण होइ जीवत्तं ॥४९॥ थोवा नपुंससिद्धा, थी नरसिद्धा कमेण संखगुणा । इअ मुक्खतत्तमेअं, नवतत्ता लेसओ भणिआ ॥५०॥ जीवाइ नव पयत्थे, जो जाणइ तस्स होइ सम्मत्तं । भावेण सद्दहंतो, अयाणमाणेवि सम्मत्तं ॥५१॥ सव्वाइं जिणेसर, भासियाई वयणाइं नन्नहा हुंति । इअ बुद्धि जस्स मणे, सम्मत्तं निच्चलं तस्स ॥५२॥ अंतोमुहुत्तमित्तंपि फासियं हुज्ज जेहिं सम्मत्तं । तेसिं अवड्ढपुग्गल, परियडो चेव संसारो ॥५३॥ उस्सप्पिणी अणंता, पुग्गल परिअट्टओ मुणेयव्वो । ते ऽणंताऽतीअद्धा, अणागयद्धा अणंतगुणा ॥५४॥
श्री नवतत्त्व प्रकरण
