________________
२४९
मूलशुद्धिप्रकरणम्-द्वितीयो भागः
एयाणिय अन्नाणि य चितंतो जाव तत्थ पउमाभो । चिट्ठइ ताव हुयवहो पज्जलिऊणं समाढत्तो ॥३०९॥ चंडानिलाहएणं धूमेणं बहलकज्जलनिभेणं । संछण्णं गयणयलं पाउसकाले व्व मेहेहिं ॥३१०॥ धगधगधगितसद्दो पज्जलिओ हुयवहो कणयवण्णो । गाउयपरिमाणासु य जोण्हासु नहं पदीवंतो ॥३११॥ कि होज्ज दिणयरसयं समुग्गयं किं च महियलं भेत्तुं । उप्पायनगवरिंदो विणिग्गओ दूसहपयावो ॥३१२॥ अइधवलचंचलाओ सव्वत्तो विप्फुरंति जालाओ । सोयामणीउ नज्जइ गयणयले उग्गतेयाओ ॥३१३॥ एवंविहम्मि जलणे पज्जलिए उट्ठिया जणयधूया । दाऊण काउसग्गं थुणइ जिणे उसहमाईए ॥३१४।। सिद्धा य तहाऽऽयरिया साहू जगविस्सुया उवज्झाया । पणमइ विसुद्धहियया पुणो विमुणिसुव्वयं सिरसा ॥३१५।। एए नमिऊण तओ जंपइ "सच्चेण साविया सव्वे । निसुणंतु लोगपाला मह वयणं सासणसुरा य ॥३१६।। जइ मण-वयण-तणूहिं रामं मोत्तूण परनरो कोइ । सुविणे वि हु अहिलसिओ तो डहउ इमो ममं अग्गी ॥३१७॥ अह पुण मोत्तूण पई निययं अण्णो ने वासिओ हियए । ता मा डहउ हुयवहो जइ सीलगुणस्स माहप्पं" ॥३१८॥ सा एव जंपिऊणं तओ पविट्ठाऽनलं जणयतणया ।। जायं जलं सुविमलं सुद्धा दढसीलसंपण्णा ॥३१९॥ ण य दारुयाणि न तणं ण य हुयवहसंतिया उ इंगाला । नवरं आलोइज्जइ वावी सव्वत्थ जलभरिया ॥३२०॥ भेत्तूण धरणिवढे उच्चलियं तं जलं गुलुगुलितं । वियडगभीरावत्तं संघटुटेतफेणोहं ॥३२१॥
१. ला. परिणाहासु ॥ २. ला. न यासि णे हियए । मूल. २-३२
