Page Text
________________
बलमयनामगमेयं, चउत्थयं कित्तियं मयट्ठाणं । सुयगोयरं पि एत्तो, पंचमगं कि पि साहेमि
॥६७७७॥ संपइ पसरंतनिरंतरोरु-मिच्छत्ततिमिरपब्भारे। पभवंतपबलपरमय-जोइसचक्कप्पयारम्मि
॥६७७८॥ परमप्पमायनिब्भर-विलसंतसुदुव्वियड्घूयम्मि। दंसणपयत्तपरपाणि-निवहहयदिट्ठिपसरम्मि
॥६७७९॥ भुवणगयणंऽगणम्मि, सण्णाणदिवायरो अहं चेव । एवं तुमं सुयमयं, मणयं पि करेज्ज मा धीर!
॥६७८०॥ किचसुत्तत्थतदुभएहिम्वि, चोद्दसपुव्वाणि जाण होताणि । छट्ठाणाऽऽवडियत्तं, सुव्वइ ताणं पि अण्णोण्णं
॥६७८१॥ जइ ता को णु सुयमओ, विसेसओ अज्जकालियजईणं । जेसि मइतुच्छत्ता, न तहाविहसुयसमिद्धी वि ॥६७८२॥ तथाहिनो ता अंगाऽणंगप्पविट्ठ-सुयसुद्धपरिचयो अज्ज । नो तह निज्जुत्तीसु वि, न भासचुण्णिसु न वित्तीसु ॥ ६७८३॥ संविग्गगीयसक्किरिय-पुव्वमुणिकयपइण्णगाऽऽइसु वि । जइ न तह परिचओ ता, न हु कायव्वो सुयमओ वि ॥६७८४ ॥ संते वि सयलसुत्तऽत्थ-पारगत्ते न सुयमओ जुत्तो। काउं किमंग! तदऽपार-गत्तणम्मि जओ भणियं ॥६७८५ ॥ मा वहउ को वि गव्वं, एत्थ जए पंडिओ अहं चेव । आसव्वण्णुमयाओ, तरतमजोगेण मइविहवो
॥६७८६॥ दुस्सिक्खियकइरइए, समयविरुद्ध य अहिगए वि दढं। पगरणकहापबंधे, अवगासो च्चिय न हु मयस्स ॥६७८७॥ सामाइयमेत्तसुया वि, केवलाऽऽलोयमऽमलमऽणुपत्ता । सुयसिंधुपारगा पुण, वुत्थाऽणंतेसु चिरकालं ॥६७८८॥ ता मा सव्वमयहरं, सुयं पि संपाविऊण तव्विसयं । थेवं पि मयं काहिसि, तुममऽणसणिओ विसेसेण ॥६७८९॥ किं न सुयं सुयरासी, सुयमयदोसेण थूलभद्दो वि। अंतिमचउपुव्वाणं, छिण्णाऽणुण्णो कओ गुरुणा ॥६७९०॥ तहाहि. पाडलिपुत्ते नगरे, रण्णो नंदस्स विस्सुयजसस्स । मंती सयडालो आसि, सयलनिरवज्जकज्जकरो
॥ ६७९१॥ पुत्तो य थूलभद्दो, पढमो से बीयओ सिरिओ त्ति । रूववईओ धूयाओ, सत्त जक्खापमोक्खाओ
॥६७९२॥ सेणा वेणा रेणत्ति, ताण पज्जंतिमाउ तिण्णेव । गेण्हंति एक्क-दो-तीहि, वायणेहिं अपुव्वसुयं
॥ ६७९३॥ जिणपयपूयणवंदण-समयऽत्थविभावणप्पमुहधम्मं । सम्मं कुणमाणाणं, तेसि वोलेंति दियहाई
॥६७९४ ॥ अह वत्थव्वो तत्थेव, भूवई वररुई कई विप्पो। अप्पुव्वट्ठसएणं, वित्ताणं थुणइ पइदियहं
॥ ६७९५ ॥ तक्कव्वसत्तितुट्ठो, राया दाणं समीहए दाउं। नवरं सयडालम्मि, अपसंसंते न देइ त्ति
॥६७९६॥ तो वररुइणा सयडाल-भारिया कुसुमदाणमाऽऽईहिं । उवचरिया तो तीए, भणिओ सो कहसु कज्जं ति ॥६७९७॥ वज्जरियं तेण तए, भणियव्वो तह कहं पि हु अमच्चो । जह रायपुरो कव्वं, पढंतयं मं पसंसेइ
॥६७९८॥ पडिसुयमिमीए वुत्तो, मंती किं वररुई न सलहेसि । तेणं पयंपियं कह, मिच्छदि४ि पसंसामि
॥६७९९॥ अह पुणरुत्तं तीए, भणिरीए पडिस्सुयं अमच्चेणं । रायपुरो पढमाणो, पसंसिओ सो सुपढियं ति
॥६८००॥ तो अट्ठसयं रण्णा, दीणाराणं दवावियं तस्स । जाया पइदिवसं चिय, एत्तियमेत्ता य से वित्ती
॥६८०१॥ अत्थखयं च पलोइय, भणियमऽमच्चेण देव! किमिमस्स । देहि त्ति तेण वुत्तं, सलाहिओ जं तए एस ॥६८०२॥ भणियमऽमच्चेण मए, अविणटुं पढइ लोयकव्वं ति । सलहियमेयस्स ततो, रण्णा पुट्ठो कहं एवं
॥६८०३॥ तेणं भणियं मज्झं, धूयाओ वि हु पढंति जेणेवं । उचियसमए य पत्तो, पढणत्थं वररुई तत्तो
॥६८०४॥ जवणियअंतरियाओ, धरियाओ मंतिणा सधूयाओ। सेणाए पढमवाराए, अहिगयं से पढंतस्स
॥६८०५॥ ता तीए नरवइणो, पुरओ अविणट्ठमुच्चरंतीए । वाराहिं दोहिं पढियं, वेणाए तीए वुत्तम्मि
॥ ६८०६॥ तइयाए वाराए, रेणाए अहिगयं च वुत्तं च । चिरपढियं पिव सयमेव, विरइयं पिव नरिंदपुरो
॥६८०७॥ तो कुविएणं रण्णा, दुवारमऽवि वारियं वररुइस्स। पच्छा सो गंगाए, जंतपयोगेण दीणारे
॥ ६८०८॥ ठविऊणं रयणीए, पभायसमयम्मि संथवं काउं। पाएण हणइ जंतं, तत्तो गिण्हेइ दीणारे
॥ ६८०९॥ भणइ य लोयाण पुरो, थुइतुट्ठा मज्झ देइ गंग त्ति । कालंतरेण रण्णा, सोउं सिटुं अमच्चस्स
॥ ६८१०॥ तेणं भणियं जइ मह, पुरो इमा देइ देइ ता देव!। वच्चामो य पभाए, गंगाए पडिस्सुयं रण्णा
॥६८११॥
૧૨
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |