________________
११४९ पणवेइयाविसुद्ध, छहोसविमुक्कं पंचविसविहं । पडिलेहणं कुणंतो, छत्तीसगुणो गुरू जयउ ॥२८॥ सत्तावीसविहेहि, अणगारगुणेहिं भूसियसरीरो । नवकोडिसुद्धगाही, छत्तीसगुणो गुरू जयउ ॥२९॥ अडवीसलद्धिपयडण-पउणो लोए तहा पयासंतो । अडविहपभावगत्तं, छत्तीसगुणो गुरू जयउ ॥३०॥ एगूणतीसभेए, पावसुए दूरओ विवज्जंतो। सगविहसोहिगुणण्णू, छत्तीसगुणो गुरू जयउ ॥३१॥ महमोहबंधठाणे, तीसं तह अंतरारिछक्कं च । लोए निवारयंतो, छत्तीसगुणो गुरू जयउ ॥३२॥ इगहियतीसविहाणं, सिद्धगुणाणं च पंचनाणाणं । अणुकित्तणेण सम्मं, छत्तीसगुणो गुरू जयउ ॥३३॥ तह बत्तीसविहाणं, जीवाणं रक्खणंमि कयचित्तो। जियचउव्विहोवसग्गो, छत्तीसगुणो गुरू जयउ ॥३४॥ बत्तीसदोसविरहिय-वंदणदाणस्स निच्चमहिगारी । चउविहविगहविरत्तो, छत्तीसगुणो गुरू जयउ ॥३५॥ तित्तीसविहासायण-वज्जणजुग्गो य वीरिआयारं । तिविहं अणिगृहंतो, छत्तीसगुणो गुरू जयउ ॥३६॥ गणिसंपयट्टचउविह, बत्तीसं तेसु निच्चमाउत्तो। चउविहविणयपवित्तो, छत्तीसगुणो गुरू जयउ ॥३७॥ जइवि हु सूरिवराणं, सम्मं गुणकित्तणं करेउं जे । सक्कोवि नेव सक्कइ, कोऽहं पुण गाढमूढमई ॥३८॥ तहवि हु जहासुआओ, गुरुगुणसंगहमयाउ भत्तीए । इय छत्तीसं छत्तीसियाउ, भणियाउ इह कुलए ॥३९॥ सिरिवयरसेणसुहगुरु-सीसेणं विरड्यं कुलगमेयं । पढिऊणमसढभावा, भव्वा पावंतु कल्लाणं ॥४०॥
