________________
परिशिष्टम्-१ गुरुगुणपत्रिंशत्वनिशिकाकुलकगतमूलवृत्तानां सूचिः ।
वीरस्स पए पणमिय, सिरिगोयमपमुहगणहराणं च । गुरुगुणछत्तीसीओ, छत्तीसं कित्तइस्सामि ॥१॥ चउविहदेसणकहध-म्मभावणासारणाइकुसलमई। चउविहचउझाणविऊ, छत्तीसगुणो गुरू जयउ ॥२॥ पणविहसम्मचरणवय-ववहारायारसमिइसज्झाए । इगसंवेगे अरओ, छत्तीसगुणो गुरू जयउ ॥३॥ इंदियविसयपमाया-सवनिहकुभावणापणगच्छक्के । छसु काएसु सजयणो, छत्तीसगुणो गुरू जयउ ॥४॥ छव्वयणदोसलेसा-वस्सयसहव्वतक्कभासाण । परमत्थजाणणेणं, छत्तीसगुणो गुरू जयउ॥५॥ सगभयरहिओ सगपिंडपाणएसणसुहेहिं संजुत्तो । अट्ठमयठाणरहिओ, छत्तीसगुणो गुरू जयउ॥६॥ अट्ठविहनाणदंसण-चरित्तायारवाइगुणकलिओ। चउविहबुद्धिसमिद्धो, छत्तीसगुणो गुरू जयउ॥७॥ अट्ठविहकम्मअट्ठ-गजोगमहसिद्धिजोगदिद्विविऊ । चउविहऽणुओगनिउणो, छत्तीसगुणो गुरू जयउ ॥८॥ नवतत्तण्णू नवबं-भगुत्तिगुत्तो नियाणनवरहिओ। नवकप्पकयविहारो, छत्तीसगुणो गुरू जयउ ॥९॥ दसभेयअसंवरसं-किलेसउवघायविरहिओ निच्चं । हासाइछक्करहिओ, छत्तीसगुणो गुरू जयउ ॥१०॥ दसविहसामायारी-दसचित्तसमाहिठाणलीणमणो। सोलसकसायचाई, छत्तीसगुणो गुरू जयउ ॥११॥ पडिसेवसोहिदोसे, दस दस विणयाइचउसमाहीओ। चउभेयाउ मुणंतो, छत्तीसगुणो गुरू जयउ ॥१२॥ दसविह वेआवच्चं, विणयं धम्मं च पडु पयासंतो। वज्जियअकप्पछक्को, छत्तीसगुणो गुरू जयउ ॥१३॥
