________________
યોગસાર પ્રકરણ/સંકલના યોગીઓ શાસ્ત્રવચનથી ચિત્તને ભાવિત કરીને બાહ્ય વિષયોમાં જવા માટે પ્રવર્તે નહિ તેવું મૃતપ્રાયઃ ચિત્ત કરે છે અને કાયા જિનવચન અનુસાર સંયમવૃદ્ધિના પ્રયોજન વગર લેશ પણ પ્રવર્તે નહિ તેવી મૃતપ્રાયઃ કરે છે અને ઇન્દ્રિયો બાહ્ય સર્વ વિષયોમાં ઉત્સુક્તા વગરની થાય તેવી મૃતપ્રાયઃ કરે છે, તેવા યોગીઓ ભાવશુદ્ધિ દ્વારા સામ્યભાવમાં ઉદ્યમ કરી શકે છે. માટે યોગીએ નિરર્થક વિચારરૂપ દુર્ગાનનો નિરોધ કરવો જોઈએ, શાસ્ત્રથી અનિયંત્રિત વચનનો નિરોધ કરવો જોઈએ અને કાયાના ચાપલ્યનો નિરોધ કરવો જોઈએ.
વળી, ભાવશુદ્ધિ માટે યોગીએ સર્વકાર્યમાં ઔચિત્યનો વિચાર કરીને પ્રવૃત્તિ કરવી જોઈએ. જેથી ઔચિત્યના પાલનથી મોહથી અનાકુળ થયેલો આત્મા ભાવશુદ્ધિને પામે. વળી ભાવશુદ્ધિ માટે લોભાદિ કષાયોનો સદા ત્યાગ કરવો જોઈએ અને સંતોષ આદિ ભાવમાં સદા ઉદ્યમ કરવો જોઈએ.
વળી, આત્માને ભાવનાઓથી ભાવિત કરીને સદા તત્ત્વ માર્ગને અભિમુખ કરવો જોઈએ, જેથી જીવમાં સાત્ત્વિકભાવ પ્રગટે અને સત્ત્વના બળથી તે મહાત્મા સામ્યભાવને પ્રાપ્ત કરીને સંસારના અંતને પ્રાપ્ત કરે.
છદ્મસ્થતાને કારણે શ્રી જિનેશ્વરદેવની આજ્ઞાથી વિરુદ્ધ કે ગ્રંથકારશ્રીના આશયથી વિરુદ્ધ કાંઈપણ લખાયું હોય તો ત્રિવિધ ત્રિવિધ મિચ્છા મિ દુક્કડં.
" " - પ્રવીણચંદ્ર ખીમજી મોતા
તિથિઃ ફાગણ વદ-૪ ૨૦૧૫ તારીખઃ ૧૪-૩-૨૦૦૯, શનિવાર ૩૦૨, વિમલવિહાર, સરરવતી સોસાયટી, પાલડી, અમદાવાદ-૭.
