Page Text
________________
आख्यानकमणिकोशे
पेच्छऽच्छरीयबहुवायसंजुयं जिणमयं जए जयइ । सिहिणो विमणा हंसा य सहरिसा जम्मि संजाया ॥३१॥ मुयपंतीए फलयं पि भक्खिडं सालिरक्खिया सालिं । देइ न जमदायारे कुणंतु किं रत्तवयणा वि ? ॥३२॥ उय सालिरक्खियाए सुदूरमुड्डाबिऊण सुयसेणिं । खित्ता किविणघरेसुं कुणंतु किं वा सपक्खा वि ? ॥३३॥ सउणेहिं संसियाओ सस्सइ ओसह..."सहलाओ ! सस्सेहिं समं सोहंति जम्मि सुहछेत्तसीमाओ ॥३४॥ जम्मि सुविसिट्टपरिपुट्टिलट्ठगोविंदतड्डियमुहाओ। गोटुंगणभूमीओ भमंतगोवीओ हंति ॥३५।। खत्तेहि समलिणेहिं धणेहिं संगे गया वि मलिणत्तं । सुइसंगे मुझंती सारयगयणं व गरुया वि ॥३६।। पेच्छह पयडपयायो अहिययरं सरयसंगमे वि रवी । निव्वडियपयावगुणा कुणंतु जे किंपि तह वि मुहा ॥३॥ विमलियनहम्मि सरयम्मि ससहरो अहह ! पेच्छ सकलंको । अहवा निम्मलसंगे वि नऽन्नहा जायइ सहावो ॥३८॥ इय एरिसम्मि सरए पकामकामम्मि सो इलापुत्तो। कइया वि कीलिउं काणणम्मि निजाइ सवयंसो ॥३९|| तत्थ ललंतो लीलाए लंखियं लहुललामलायन्नं । सोहम्ग-रूव-मुंदेरमंदिरं मयणघरणिं व ॥४९॥ नवजोव्वणरमणीयं नडधूयं नियइ मयणसबरम्स । जेउं जयं व विहिणा विणिम्मियं निसियभल्लि व ।।४१॥ पावो पेच्छइ मह पणइणि ति कामेण जायकोवेण । समगं सवंगं पि हु विद्धो पंचहि वि बाणेहिं ॥४२॥ ताहे अयकीलयकीलिउ व्व थिमिउ व्व चित्तलिहिउ व्व । लेप्पयमउ व्व मुच्छागउ व्व पाहाणघडिउ व्व ॥४३॥ जा तयवत्थो चिट्टइ तो तग्गयमणवियप्पकुसलेहिं । हरिस-विसायाउलमाणसेहिं मित्तेहिं संलत्तो ॥४४॥ उस्सूरं संजायं महई वेला समागयाणऽम्हं । ता गच्छामो गेहं कल्ले पुणरागमिस्सामो ॥४५॥ तं पि हु ता परिसंतो मा किमवि सरीरकारणं होही । अम्मा-पियरो दूरं तुह अवसेरिं करिस्संति ॥४६॥ वारं वारं भणिओ वि जाव तग्गयमणो न चिंतेइ । बाहाए घेत्तणं बला वि नीओ जणयगेहं ॥४७॥ तत्थ वि हसइ वियंभइ पलवइ रोवइ निरिक्खए सुन्नं । तत्तथले पक्वित्तो मच्छो व्व रई न पाउणइ ।।४८|| जा कट्टदसं पत्तो ताव य जणयम्स से निवेइन्ति । सो वि निसामिय वजाहउ व्व जाओ विसन्नमणो ॥४९॥ साणुणयं सप्पणयं सुजुत्तजुत्तिक्खमं खमासारं । परिफुसिय मुहं मुहरं भणियं सुण वच्छ ! मह वयणं ॥५०॥
पढियस्स तस्स सुणियम्स तस्स निरुवमकलाकलावस्स । मुहगुरुउवएसस्स य अवसाणं एरिसं वच्छ ! ॥५१॥ किंच
लजिज्जइ जेण जणो महलिज्जइ नियकुलक्कमो जेण । कंटट्ठिए वि जीए कुणंति न कया वि तं सुयणा ॥५२॥ अन्नं च निवो नाही सो मह सव्वस्सनिग्गहं काही । परजणो वि हु भणिही अकज्जमिमिणा समायरियं ॥५३।। ता संति रूव-गोव्वण-लायन्नपवाहसारणीओ व्व । कुलबालियाओ ताओ वच्छस्स कए वरिस्सामि ॥५४।। ता नीयाए किमेयाए वच्छ ! रूवाइगुणजुयाए वि। सीयं पि पओ मायंगकूवए पियइ कि विप्पो ? ||५५।।
भणियं च तेण अहमवि ताय ! वियाणामि जं तए भणियं । किंतु मह कम्मपरिणइवसेण विसमं तहिं पेम्मं ॥५६॥ जओ भणियं
धारिजइ इंतो जलनिही वि कल्लोलभिन्नकुलसेलो । न हु पुब्वजम्मनिम्मियसुहा-ऽसुहो कम्मपरिणामो ॥५॥ अवरं च
ता लज्जा ता माणो ता इह-परलोयचिन्तणे बुद्धी । जा न विवेयजियहरा मयणम्स सरा पहुप्पंति ॥५८॥ ताव परो वि हसिज्जइ कीरइ माणं थिरत्तणं लज्जा । जा विसमे न पडिज्जइ अस्थाहे पेम्मकृवम्मि ||५९।। सुयनिच्छयं वियाणिय मग्गामि तयपि कि वियप्पेण ? | मा मह सुयम्स जीवियसमम्स अच्चाहियं होही ॥६०॥ गंतृण मग्गिओ सो सुवन्नतुलियं पयच्छ नियधूयं । भणियं तेण महायस ! सुवन्न अक्खयनिही एसा ॥६॥ ता जइ कज्ज मज्झं मिलेउ सो तुह सुओ किमन्नेण ? । गोरवअरिहस्स गिहागयम्स साहेमि कज्जमिणं ॥६२।। आगंतुणं जणएण लंखियाजणयभासियं कहियं । सो वि य निसामिऊणं मणे विसन्नो वियप्पेड ॥६॥
Jain Education International
For Private & Personal Use Only
www.jainelibrary.org
| SR No. | 016006 |
| Book Title | Akhyanakmanikosha |
| Original Sutra Author | Nemichandrasuri |
| Author | Punyavijay, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2005 |
| Total Pages | 504 |
| Language | Prakrit, Sanskrit |
| Classification | Dictionary & Story |
| File Size | 13 MB |