Page Text
________________
७४
आख्यानकमणिकोशे
तो रुप्पिणीए हरिणो चरणे नमिऊण पभणियं सामि !। रक्खावसु मह भायरमह हरिणा हलहरो भणिओ ।।७।। रक्खेयब्बो भाया इमीए भणिऊण भायरं कन्हो । संचलिओ बारवईसमुहो एत्तो य बलदेवो ॥७६॥ उग्गिन्न मुसलदंडो कुद्धो रिउकडयसम्मुहो चलिओ। चूरंतो करडिघडं करिकुलकुद्धो मइंदो व्व ।।७७।। तत्तो तुरंग-कुंजर-नर-नरवइपभिइसत्तुसंदोहं । कोवेण दट्टउट्टो मारइ मुसलप्पहारेहिं ॥७८|| लोट्टावइ भडनियरं तोडइ दोघट्टथट्ट मुंडाओ । मोडइ सियायवत्ते फाडइ पडिभडधयवडे य ॥७९॥ भंजइ रणंतघंगलिडंबरं रहवराण संदोहं । फोडइ गुडं गइंदाण दलइ सत्तूण संघायं ।।८०॥ के वि हु कमेयु घेत्तूण नहयले भामिऊण कुद्धमणो । रयगो व्व सिलाए पडं अच्छोडइ धरणिवीढम्मि ॥८॥ पाडेवि के वि महिमंडलम्मि दाऊण वंसए पायं । मोडइ तड ति मज्झाओ सुक्कएरंडकट्टे व ॥८२।। काण वि पायं दाऊण मत्थए तोडिउं भुयाजुयलं । तडयडतुटुंतसिरं पक्खिवइ बलिं व दिसिचक्के ॥८३।। सुहडेण हणइ मुहडं तुरयं तुरएण करिवरं करिणा । चूरइ रहं रहेणं तत्तो सव्वं बलं तस्स ।।८४॥ सीहस्स व हरिणकुलं गयजायं गंधसिंधुरस्सेव । सूरम्स व तमजालं नटुं दट्टुं तयं तत्तो ।।८।। उद्धाइऊण उम्मुक्कहक्कहुंकारभीसणो पत्तो । भामियकरालकरवालमंडलो झत्ति सिसुपालो ॥८६॥ ता हलहरेण उम्मुक्कमुसलघाएण तस्स करवालं । दोहंडियं तओ तेण कड्दियं चंडकोदंडं ॥८॥ तं पि हु तहेव भग्गं लग्गं तस्सेव उत्तमंगम्मि । तो जाव पीडिओ सो नियकोदंडस्स खंडेणं ॥८८|| तो हक्कंतो पत्तो रुप्पी दुप्पेच्छरत्तनेत्तजुओ । रे रे गोव ! न होहिसि इण्हि एवं पयंपंतो ।।८९॥ मोत्तण मुसलदंडं हढेण परिताडिओ करयलेण । पाडेऊणं महिमंडलम्मि तोडेवि सन्नाहं ॥९॥ हृढआयड्डियछुरियाए छिदिउं तस्स कुंतलकलावं । तो हलहरेण भिउडीभीमेणेयारिसं भणिओ ॥११॥ रे मुक्को जीवंतो वच्चसु ठाणम्मि इय पयंपेउं । चइऊण तयं भडरुंडमुंडमालं पलोयंतो ॥१२॥ नीहरिऊण रणंगणभूमीओ कन्हपासमल्लीणो । पत्तो य बारवइनयरिपरिसरे रुप्पिणी हरिणा ॥१३॥ भणिया पिए ! इमा सा बारवई पुरवरी मह निमित्तं । जा निम्मविया धणएण कणयनिम्मियसुपासाया ॥९॥ ता भुंजसु इह भोए मए समं पमुइया तओ सा वि । जंपइ पिययम ! तुह संति रूव-जोव्वणगुणडाओ ॥९॥ उत्तमकुलजायाओ दासी-दासाइपरियणजुयाओ । अंतेउरीओ सोहाविणिज्जियामरपुरंधीओ ॥१६॥ एगागिणी अहं पुण आणीया बंदिणि व्व एत्थ तए । तो तह करेसु न जहा हासट्टाणं भवामि अहं ॥९॥ कण्हेण तओ भणियं मा बीहसु देवि ! तह करिस्सामि । जह सव्वपणइणीणं सिरोमणित्तं समुव्वहसि ॥९८॥ इय पभणिऊण कन्हेणुज्जाणे सिरिहरम्मि गंतूण । मुक्का सिरीए ठाणम्मि रुप्पिणी पडिममवणेउं ॥९९॥ भणिया य जया सिरिपणमणत्थमंतेउरीओ सव्वाओ । आगच्छंति तया तं अणिमिसनयणा भवेज्जासु ॥१०॥ इय जंपिऊण कन्हो नियए भवणम्मि जा समणुपत्तो । कत्थ तुह वल्लहा सा ? ता भणियं सच्च भामाए ॥१०१॥ कहिया हरिणा सिरिमंदिरम्मि ता सच्चभामपमुहाओ। अंतेउरीओ पत्ताओ तत्थ सिंगारियंगीओ ॥१०२॥ तो सच्चाए उत्तत्तकणयछायं निमेसरहियच्छि । लच्छि त्ति कलिय पूयापुरस्सरं पणमिऊण तओ ॥१०३।। पभणइ सामिणि ! पसिऊण रमणिमागंतुगं ममाहिन्तो। रूवाइगुणकलावेण विरहियं कुणसि जइ कह वि ॥१०४॥ ता तुज्झ पउरपरिमलमिलंतरोलंबरोलमुहलेहिं । वियसंतपवरपुप्फेहिं पूयणं आयरिस्सामि ॥१०५॥ इय पभणिऊण पत्ता हरिणो पासम्मि पुच्छइ कहिं सा ? । लच्छीहरे पयंपिय कन्हो संतेउरो पत्तो ॥१०६॥ तो रुप्पिणीए अब्भुट्ठिऊण पुट्ठो नमामि कत्तो हं ? । तेणावि नेत्तपन्तेग दंसिया सच्चभामा से ॥१०७।। देवी वि सच्चभामा पयंपए पणमिया मए एसा । तो पहसिऊण हरिणा भणियं किर एत्थ को दोसो ? ॥१०८|| जं भइणीए भइणी पणमइ इय जंपिऊण नियभवणे । गंतूण रुप्पिणीए पणएणं देइ महुमहणो ॥१०९॥ आभरण-रयण-कंचण-दासी-दासाइयं महविभूई। नाऊण सच्चभामा मणम्मि गुरुमच्छरं वहइ ॥११०॥ अह अन्नया य नारयरिसिणा गंतूण साहियं हरिणो । जह वेयडे खयरस्स जंबवंतस्स भज्जाए ॥१११।।
Jain Education Interational
For Private & Personal Use Only
www.jainelibrary.org
| SR No. | 016006 |
| Book Title | Akhyanakmanikosha |
| Original Sutra Author | Nemichandrasuri |
| Author | Punyavijay, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2005 |
| Total Pages | 504 |
| Language | Prakrit, Sanskrit |
| Classification | Dictionary & Story |
| File Size | 13 MB |