________________
प०.१ लयाओ] सुत्तागमे
२७५ य ५ वल्ली य ६ पव्वगा चेव । ७ तण ८ वलय ९ हरिय १० ओसहि ११ जलरुह १२ कुहणा य बोद्धव्वा ॥ ३० ॥ से किं तं रुक्खा ? रुक्खा दुविहा पण्णत्ता । तंजहा-एगबीया य बहुबीयगा य ॥ ३१ ॥ से किं तं एगबीया ? एगबीया अणेगविहा पन्नत्ता । तंजहा–णिबंबजंबुकोसंबसालअंकुल्लपीलु सेलू य । सल्लइमोयइमालुयबउलपलासे करंजे य ॥१॥ पुत्तंजीवयऽरिठे बिहेलए हरिडए य भिल्लाए । उबेभरियाखीरिणि बोद्धव्वे धायइपियाले ॥ २ ॥ पूइयनिंबकरंजे सण्हा तह सीसवा य असणे य। पुन्नागनागरुक्खे सीवण्णि तहा असोगे य ॥ ३ ॥ जेयावण्णे तहप्पगारा। एएसि णं मूला वि असंखेजजीविया, कंदा वि, खंधा वि, तया वि, साला वि, पवाला वि। पत्ता पत्तेयजीविया, पुप्फा अणेगजीविया, फला एगबीया । सेत्तं एगबीया ॥३२॥ से किं तं बहुबीयगा ? बहुबीयगा अणेगविहा पन्नत्ता । तंजहा-अत्थियतेंदुकविढे अंबाडगमाउलिंग बिल्ले य । आमलगफणिसदालिमआसोटे उंबरवडे य ॥१॥ णग्गोहणंदिरुक्खे पिप्परों सयरी पिलुक्खरुक्खे य। काउंबरि कुत्थंभरि बोद्धव्वा देवदाली य ॥२॥ तिलए लउए छत्ताहसिरीसे सत्तवन्नदहिवन्ने । लोधवचंदणजुणणीमे कुडए कयंबे य ॥ ३ ॥ जेयावन्ने तहप्पगारा। एएसि णं मूला वि असंखेज्जजीविया, कंदा वि, खंधा वि, तया वि, साला वि, पवाला वि । पत्ता पत्तेयजीविया। पुप्फा अणेगजीविया। फला बहुबीयगा । सेत्तं बहुबीयगा । सेत्तं रुक्खा ॥ ३३ ॥ से किं तं गुच्छा ? गुच्छा अणेगविहा पन्नत्ता। तंजहा-वाइंगणिसल्लइथुण्डई य तह कच्छुरी य जासुमणा । रूवी आढइ णीली तुलसी तह माउलिंगी य ॥१॥ कच्छंभरि पिप्पलिया अयसी वल्ली य कायमाईया। वुच्चू पडोलकंदलि विउव्वा वत्थुले बयरे ॥२॥ पत्तउर सीयउरए हवइ तहा जवसए य बोद्धव्वे । णिग्गुंडिय कत्तुंबरि अत्थई चेव तालउडा ॥ ३ ॥ सणपाणकासमुद्दगअग्घाडगसामसिंदुवारे य । करमद्दअहरूसगकरीरएरावणमहित्थे ॥ ४॥ जाउलगमालपरिलीगयमारिणिकुव्वकारिया भंडी। जावइ केयइ तह गंज पाडला दासिअंकोल्ले ॥ ५ ॥ जेयावन्ने तहप्पगारा। सेत्तं गुच्छा ॥ ३४ ॥ से किं तं गुम्मा ? गुम्मा अणेगविहा पन्नत्ता । तंजहा-सेरियए णोमालियकोरंटयबंधुजीवगमणोजे । पिइयपाणकणयरकुजय तह सिंदुवारे य ॥१॥ जाई मोग्गर तह जूहिया य तह मल्लिया य वासंती। वत्थुल कत्थुल सेवाल गंठि मगदंतिया चेव ॥ २ ॥ चंपगजाई णवणीइया य कुंदो तहा महाजाई । एवमणेगागारा हवंति गुम्मा मुणेयव्वा ॥ ३ ॥ सेत्तं गुम्मा ॥ ३५ ॥ से कि तं लयाओ ? लयाओ अणेगविहाओ पन्नत्ताओ। तंजहा-पउमलया णागलयअंसोगचंपगलया य चूयलया। वणलयवासंतिलया अइमुत्तयकुंदसामलया॥जेयावन्ने तहप्पगारा। सेत्तं लयाओ॥३६॥
