________________
१३२
सुत्तागमे
[ जीवाजीवाभिगमे
तिविहेसु होइ भेओ ठिई य संचिट्ठणंतरsप्पबहुं । वेयाण य बंधठिई वेओ तह किंपगारो उ ॥ १ ॥ ६४ ॥ दोच्चा तिविहा पडिवत्ती समत्ता ॥
तत्थ जे ते एवमाहंसु चउव्विहा संसारसमावण्णगा जीवा पण्णत्ता ते एवमाहंसु, तंजहा— नेरइया तिरिक्खजोणिया मणुस्सा देवा ॥ ६५ ॥ से किं तं नेरइया ? २ सत्तविहा पण्णत्ता, तंजहा - पढमा पुढविनेरइया दोच्चापुढविनेरइया तच्चापुढविनेर ० चउत्थापुढवीनेर० पंचमापु०नेरइया छट्टापु ० नेर० सत्तमापु०नेरइया ॥ ६६ ॥ पढमा णं भंते! पुढवी किंनामा किंगोत्ता पण्णत्ता ? गोयमा ! णामेणं घम्मा गोत्तेणं रयणप्पभा । दोच्चा णं भंते! पुढवी किंनामा किंगोत्ता पण्णत्ता ? गोयमा ! णामेणं वंसा गोत्तेणं सकरप्पभा, एवं एएणं अभिलावेणं सव्वासिं पुच्छा, णामाणि इमाणि सेला तइया अंजणा चउत्थी रिट्ठा पंचमी मघा छट्ठी माघवई सत्तमा जाव तमतमागोत्तेणं पण्णत्ता ॥ ६७ ॥ इमा णं भंते! रयणप्पभापुढवी केवइया बाहल्लेणं पण्णत्ता ? गोयमा ! इमा णं रयणप्पभापुढवी असिउत्तरं जोयणसयसहस्सं बाहल्लेणं पण्णत्ता, एवं एएणं अभिलावेणं इमा गाहा अणुगंतव्वा - आसीयं बत्तीसं अट्ठावीसं तहेव वीसं च । अट्ठारस सोलसगं अद्भुत्तरमेव हिट्ठिमिया ॥ १ ॥ ६८ ॥ इमा णं भंते! रयणप्पभापुढवी कइविहा पण्णत्ता ? गोयमा ! तिविहा पण्णत्ता, तंजहा— खरकंडे पंकबहुले कंडे आवबहुले कंडे ॥ इमीसे णं भंते! रय० पुढ० खरकंडे कइविहे पण्णत्ते ? गोयमा ! सोलसविहे पण्णत्ते, तंजहारयणकंडे १ वइरे २ वेरुलिए ३ लोहियक्खे ४ मसारगल्ले ५ हंसगब्भे ६ पुलए ७ सोगंधिए ८ जोइरसे ९ अंजणे १० अंजणपुलए ११ रथए १२ जायरूवे १३ अंके १४ फलिहे १५ रिट्ठे १६ कंडे ॥ इमीसे णं भंते! रयणप्पभापुढवीए रयणकंडे कइविहे पण्णत्ते ? गोयमा ! एगागारे पण्णत्ते, एवं जाव रिट्ठे । इमीसे णं भंते! रयणप्पभापुढवीए पंकबहुले कंडे कइविहे पण्णत्ते? गोयमा ! एगागारे पण्णत्ते । एवं आवबहुले कंडे कइविहे पण्णत्ते ? गोमा ! गागारे पण्णत्ते । सक्करप्पभा णं भंते! पुढवी कइविहा पण्णत्ता ? गोयमा ! एगागारा पण्णत्ता, एवं जाव असत्तमा ॥ ६९ ॥ इमीसे णं भंते! रयणप्पभाए पुढवीए केवइया निरयावाससय सहस्सा पण्णत्ता ? गोयमा ! तीसं णिरयावाससयसहस्सा पण्णत्ता, एवं एएणं अभिलावेणं सव्वासि पुच्छा, इमा गाहा अणुगंतव्वातीसा य पण्णवीसा पण्णरस दसेव तिण्णि य हवंति । पंचूणसयसहस्सं पंचेव अणुत्तरा गरगा ॥ १ ॥ जाव अहेसत्तमाए पंच अणुत्तरा महइमहालया महाणरगा पण्णत्ता, तंजहा— काले महाकाले रोरुए महारोरुए अपइट्ठाणे ॥ ७० ॥ अत्थि णं भंते! इमीसे रयणप्पा पुढवीए अहे घणोदहीइ वा घणवाएइ वा तणुवाएइ वा ओवासंतरेइ वा ?
