________________
सुत्तागमे
[ उत्तरज्झयणसुत्तं
मिच्छादंसणरत्ता, सनियाणा उ हिंसगा । इय जे मरंति जीवा, तेसिं पुण दुल्लहा बोही ॥ २६० ॥ सम्मद्दंसणरत्ता, अनियाणा सुक्कलेसमोगाढा । इय जे मरंति जीवा, तेसिं सुलहा भवे बोही ॥ २६१ ॥ मिच्छादंसणरत्ता, सनियाणा कण्हलेसमोगाढा । इय जे मरंति जीवा, तेसिं पुण दुलहा बोही ॥ २६२ ॥ जिणवयणे अणुरत्ता, जिणवयणं जे करेंति भावेण । अमला असंकिलिट्ठा, ते होंति परित्तसंसारी ॥ २६३ ॥ वालमरणाणि बहुसो, अकाममरणाणि चेव य बहूणि । मरिहंति ते वराया, जिणवयणं जे न जाणंति ॥ २६४॥ बहुआगमविन्नाणा, समाहिउप्पायगा य गुणगाही । एएणं कारणेणं, अरिहा आलोयणं सोउं ॥ २६५ ॥ कंदप्पकुक्कुयाई, तह सीलसहावहासविगहाई । विम्हावेंतो य परं, कंदप्पं भावणं कुणइ ॥ २६६ ॥ मंताजोगं काउं, भूईकम्मं च जे पउंजंति । सायरसइड्डिहेडं, अभिओगं भावणं कुणइ ॥ २६७ ॥ नाणस्स केवलीणं, धम्मायरियस्स संघसाहूणं । माई अवण्णवाई, किव्विसियं भावणं कुणइ ॥ २६८ ॥ अणुबद्धरोसपसरो, तह य निमित्तंमि होइ पडिसेवी । एएहिं कारणेहिं, आसुरियं भावणं कुणइ ॥ २६९ ॥ सत्थगहणं विसभक्खणं च, जलणं च जलपवेसो य । अणायारभंडसेवी, जम्मणमरणाणि बंधंति ॥ २७० ॥ इइ पाउकरे बुद्धे, नायए परिनिव्वए । छत्तीसं उत्तरज्झाए, भवसिद्धीयसं [वुडे ] मए ॥ २७१ ॥ त्ति - बेमि ॥ इति जीवाजीवविभत्ती णामं छत्तीसइमं अज्झयणं समत्तं ॥ ३६ ॥ ॥ उत्तरज्झयणसुत्तं समत्तं ॥
.१०६०
