________________
भ० ३ उ० १ ]
सुत्तागमे
मणुस्सपुरिसा, देवपुरिसा, तिरिक्खजोणियपुरिसा तिविहा प० तं० जलयरा, थलयरा, खहयरा, मणुस्सपुरिसा तिविहा प० तं० कम्मभूमिया, अकम्मभूमिया अंतरदीवया ॥१७८॥ तिविहा णपुंसगा, णेरइयणपुंसगा, तिरिक्खजोणियणपुंसगा मणुरसणपुंसगा, तिरिक्खजोणियणपुंसगा तिविहा- जलयरा थलयरा खहयरा ॥ १७९ ॥ मणुस्सणपुंसगा तिविहा प० तं० कम्मभूमिया अकम्मभूमिया अंतरदीवगा, तिविहा तिरिक्खजोणिया, इत्थी पुरिसा णपुंसगा ॥ १८० ॥ णेरइयाणं तओ लेस्साओ प० तं॰ कण्हलेस्सा नीललेस्सा काउलेस्सा, असुरकुमाराणं तओ लेस्साओ संकिलिठ्ठाओ प० तं० कण्हलेस्सा नीललेस्सा काउलेस्सा एवं जांव थणियकुमाराणं । एवं पुढविकाइयाणं आउवणस्सइकाइयाणं वि तेउवाउबेइंदियतेइंदियच उरिंदियाणं वि तओ लेस्सा जहा रइयाणं, पंचिंदियतिरिक्खजोणियाणं तओ लेस्साओ संकिलिठ्ठाओ प० तं० कण्हनीलकाउलेस्सा, पंचिंदियतिरिक्खजोणियाणं तओ लेस्साओ असंकिलिठ्ठाओ प० तं० तेउपम्हसुक्कलेस्सा एवं मणुस्साणवि वाणमंतराणं जहा असुरकुमाराणं, माणियाणं तओ लेस्साओ प० तं० तेउपम्हसुक्कलेस्सा ॥ १८१ ॥ तिहिं ठाणेहिं तारारूवे चलेजा तं० विकुव्वमाणे वा परियारेमाणे वा, ठाणाओ वा ठाणं संकममाणे तारारूवे चलेजा । तिहिं ठाणेहिं देवे विज्जुयारं करेज्जा तं० विउव्वमाणे वा परियारेमाणे वा तहारूवस्स समणस्स वा णिग्गंथस्स वा इड्डि जुईं जसं वलं वीरियं पुरिसक्कारपरक्कमं उवदंसेमाणे देवे विजुयारं करेजा, तिहिं ठाणेहिं देवे थणियस करेजा तं० विउव्वमाणे एवं जहा विजुयारं तहेव थणियसद्दपि ॥ १८२ ॥ तिहिं ठाणेहिं लोगंधयारे सिया तंजहा - अरिहंतेहिं वोच्छिजमाणेहि अरिहंतपण्णत्ते धम्मे वोच्छिज्जमाणे पुव्वगए वोच्छिजमाणे । तिहिं ठाणेहिं लोगुजोए सिया तं० अरिहंतेहिं जायमाणेहिं अरिहंतेसु पव्वयमाणेसु, अरिहंताणं णाणुप्पायमहिमासु । तिहिं ठाणेहिं देवंधयारे सिया तं० अरिहंतेहिं वोच्छिज्जमाणेहिं अरिहंतपण्णत्ते धम्मे वोच्छिज्जमाणे पुव्वगए वोच्छिज्जमाणे । तिहि ठाणेहिं देवज्जोए सिया तं० अरिहंतेहिं जायमाणेहि, अरिहंतेहिं पव्वयमाणेहिं, अरिहंताणं णाणुप्पायमहिमासु । तिहिं ठाणेहि देवसन्निवाए सिया तं० अरिहंतेहिं जायमाणेहिं अरिहंतेहिं पव्वयमाणेहिं अरिहंताणं णाणुप्पायमहिमासु । एवं देवकलिया, देवकहकहए, तिहिं ठाणेहिं देविंदा माणुसं लोगं हव्वमागच्छंति तं० अरिहंतेहि जायमाणेहि अरिहंतेहिं पव्वयमाणेहिं अरिहंताणं णाणुप्पायमहिमासु, एवं सामाणिया, तायत्तीसगा लोगपाला देवा अग्गमहिसीओ देवीओ परिसोववन्नगा देवा, अणियाहिवई देवा, आयरक्खा देवा माणुसं लोगं हव्वमागच्छंति, तिहिं ठाणेहिं देवा अब्भुठ्ठेजा तं० अरिहंतेहिं जायमाणेहिं
२०५
