________________
(१.१.७-७)
चूळसीलवण्णना
२४१
अत्तभावं, अङ्गपच्चङ्गानि वा जानमानो देति “मा तेसं अनत्थो अहोसी''ति । यथा च मारकायिकानं, एवं तेहि अन्वाविट्ठानम्पि न देति, नापि उम्मत्तकानं, इतरेसं पन याचियमानो समनन्तरमेव देति तादिसाय याचनाय दुल्लभभावतो, तादिसस्स च दानस्स दुक्करभावतो।
अभयदानं पन राजतो चोरतो अग्गितो उदकतो वेरीपुग्गलतो सीहब्यग्घादिवाळमिगतो नागयक्खरक्खसपिसाचादितो सत्तानं भये पच्चुपट्टिते ततो परित्ताणभावेन दातब्बं ।
धम्मदानं पन असंकिलिट्ठचित्तस्स अविपरीतधम्मदेसना। ओपायिको हि तस्स उपदेसो दिट्ठधम्मिकसम्परायिकपरमत्थवसेन, येन सासने अनोतिण्णानं अवतारणं ओतिण्णानं परिपाचनं । तत्थायं नयो - सोपतो ताव दानकथा सीलकथा सग्गकथा कामानं आदीनवो संकिलेसो ओकारो च नेक्खम्मे आनिसंसो। वित्थारतो पन सावकबोधियं अधिमुत्तचित्तानं सरणगमनं, सीलसंवरो, इन्द्रियेसु गुत्तद्वारता, भोजने मत्तञ्जता, जागरियानुयोगो, सत्त सद्धम्मा, अट्ठतिसाय आरम्मणेसु कम्मकरणवसेन समथानुयोगो, रूपमुखादीसु विपस्सनाभिनिवेसेसु यथारहं अभिनिवेसनमुखेन विपस्सनानुयोगो, तथा विसुद्धिपटिपदाय सम्मत्तगहणं, तिस्सो विज्जा, छ अभिञा, चतस्सो पटिसम्भिदा, सावकबोधीति एतेसं गुणसंकित्तनवसेन यथारहं तत्थ तत्थ पतिठ्ठापना, परियोदपना च । तथा पच्चेकबोधियं, सम्मासम्बोधियञ्च अधिमुत्तचित्तानं यथारहं दानादिपारमीनं सभावसरसलक्खणादिसंकित्तनमुखेन तीसुपि अवत्थाभेदेसु तेसं बुद्धानं महानुभावताविभावनेन यानद्वये पतिट्ठापना, परियोदपना च । एवं महापुरिसो सत्तानं धम्मदानं देति ।
तथा महापुरिसो आमिसदानं देन्तो “इमिनाहं दानेन सत्तानं आयुवण्णसुखबलपटिभानादिसम्पत्तिञ्च रमणीयं अग्गफलसम्पत्तिञ्च निप्फादेय्य''न्ति अनं देति, तथा सत्तानं कामकिलेसपिपासवूपसमाय पानं देति, तथा सुवण्णवण्णताय, हिरोत्तप्पालङ्कारस्स च निष्फत्तिया वत्थानि देति, तथा इद्धिविधस्स चेव निब्बानसुखस्स च निप्फत्तिया यानं देति, तथा सीलगन्धनिप्फत्तिया गन्धं देति, तथा बुद्धगुणसोभानिप्फत्तिया मालाविलेपनं देति, तथा बोधिमण्डासननिप्फत्तिया आसनं देति, तथागतसेय्यनिष्फत्तिया सेय्यं देति, सरणभावनिप्फत्तिया आवसथं देति, पञ्चचक्खुपटिलाभाय पदीपेय्यं देति ।
241
Jain Education International
For Private & Personal Use Only
www.jainelibrary.org
