________________
प्राकृतस्तोत्रप्रकाशः
२७९
पव्वज्जाएऽट्ठारस-ऽजुग्गे जे ण प्पयच्छए दिक्खं । णिप्पावजोगवित्ती, ते वरसूरीसरे सरमि ॥३०॥ काउस्सग्गपदोसे, सगदसमरणे जियाण बोहंते । एसणमंडलिदोसे, मिच्छत्तसमाहिठिइविरए ॥३१॥ सबलणिबंधणविरई, सिक्खाठाणोवदंसगे विण्णे । चत्तब्भंतरगंठी, परीसहावसरणिब्भीए ॥३२॥ समणगुणावलिवरिए, नवकोडीसुद्धिरक्खणुज्जुत्ते । पडिलेहणापमत्ते, कायकिवे वेइयासुद्धी ॥३३॥ आयरणाइयभावे, णिम्मलयरजोगसंगहायरणे । अडवीसलद्धिललिए, पहावगे णममि आयरिए ॥३४|| पावस्सुयपरिवज्जी, विसोहिगुणदेसगे उयारमणे । विजियंतरारिवग्गे, मोहट्ठाणाविलित्तंगे ॥३५।। विविहाई सिद्धगुणे, संसंते जीवभेयसंदोहे । संतज्जिओवसग्गे, विणया झाएमि सूरीसे ॥३६।। विकहावंदणदोस-प्पसंगविरए पवीरियायारे । आसायणाविजोगे, आयरिए सव्वया वंदे ॥३७|| वयभावणंगनाणी, जिणसासणगयणभासभाणुणिहे । धम्मधुरंधरवसहे, परोवयारप्पमोयहरे ॥३८॥ अंगपइण्णगछेया-णुओगणंदीसुमूलसुत्तहरे । णीरागदोसवित्ती, सययं वदामि सूरीसे ॥३९।। तिगरणपंचायारे, सामायारीविसिट्ठसज्झाए । समिइप्पवित्तिमोए, वंदे सूरीसरे विहिणा ॥४०॥ पवयणजणणीराए, सुहदुहसेज्जापरूवणाणिउणे । धम्मज्झाणविभंगे, तिसच्चभासाउ बोहिते ॥४१॥ ववहारतक्कविण्णे, वाइगुणालंकिए पओगण्णे । चउविहबुद्धिनिहाणे, णवतत्तपयासगे वंदे ॥४२।। विण्णायजोगदिट्ठी, पओगमइसंपयाइपवरगुणे । तइयंगुत्ताइसए, अहिलायरिए थुणामि सया ॥४३।। तइयदिणे थिरहियया, आयरियपयप्पहाणपणिहाणं । छत्तीसगुणपमाणा, काउस्सग्गाइ कायव्वं ॥४४॥ गुरुयरसायणऽकुच्छं, मंगलऽऽज्झप्पयाहिणावत्तं । विणइ विसावहभावं, कंचणमिणमट्ठगुणकलियं ॥४५॥ आयरिया धम्मगुरू, भावामयगणवहारगुवएसा । सिरिसंघमाणणिज्जा, सासणविग्घावणोययरा ॥४६।।
