Page Text
________________
प्रश्नव्याकरण सुत्तं
एवं विवित्तवासवसहिसमिइजोगेण भाविओ भवइ अंतरप्पा णिच्चं- अहिगरणकरणकारावण पावकम्मविरओ दत्तमण्ण्णाय उग्गहरुई । बिइयं-आराम-उज्जाण-काणण-वणप्पदेसभागे जं किंचि इक्कडं च कढिणगं च जंतुगं च परामेरकुच्च-कुस-डब्भ-पलाल-मूयग-वल्लय(वच्चय) पुप्फ- फल-तयप्पवाल-कंद-मूल-तण कट्ठसक्कराइ गिण्हइ सेज्जोवहिस्स अट्ठा, ण कप्पए उग्गहे अदिण्णम्मि गिहिउँ जे हणि हणि उग्गहं अणुण्णवियं गिण्हियव्वं। एवं उग्गहसमिइजोगेण भाविओ भवड अंतरप्पा णिच्चं अहिगरण-करण- कारावण-पावकम्मविरए दत्तमणुण्णाय उग्गहरुई । तइयं-पीढफलगसिज्जासंथारगट्ठयाए रुक्खा ण छिंदियव्वा, ण छेयणेण भेयणेण सेज्जाकारियव्वा, जस्सेव उवस्सए वसेज्ज सेज्जं तत्थेव गवेसिज्जा, ण य विसमं समं करेज्जा, ण णिवाय पवायउस्सुगत्तं, ण डंसमसगेसु खुभियव्वं, अग्गी धूमो ण कायव्वो, एवं संजमबहुले संवरबहले संवुडबहुले समाहिबहुले धीरे काएण फासयंतो सययं अज्झप्पज्झाणजुत्ते समिए एगे चरिज्ज धम्मं । एवं सेज्जासमिइजोगेण भाविओ भवइ अंतरप्पा णिच्चं अहिगरण-करण कारावण-पावकम्म-विरए दत्तमणुण्णाय उग्गहरुई । चउत्थं- साहारण पिंडपायलाभे सति भोत्तव्वं संजएणं समियं ण । सायसूपाहियं, ण खलं, ण वेगियं, ण तुरियं, ण चवलं, ण साहसं, ण य परस्स पीलाकरसावज्जं तह भोत्तव्वं जह से तइयवयं ण सीयइ । साहारणपिंडपायलाभे सुहुमं अदिण्णादाणवयणियमविरमणं । एवं साहारणपिंडपायलाभे समिइजोगेण भाविओ भवइ अंतरप्पा णिच्चं अहिगरण-करण-कारावणपावकम्मविरए दत्तमण्ण्णाय उग्गहरुई । पंचमगं- साहम्मिए विणओ पउंजियव्वो, उवगरणपारणासु विणओ पउंजियव्वो, वायणपरियट्टणासु विणओ पउंजियव्वो, दाणगहणपुच्छणासु विणओ पउंजियव्वो, णिक्खमणपवेसणासु विणओ पउंजियव्वो, अण्णेसु य एवमाइसु बहुसु कारण सएसु विणओ पउंजियव्वो । विणओ वि तवो, तवो वि धम्मो, तम्हा विणओ पउंजियव्वो गुरुसु साहुसु तवस्सीसु य । एवं विणएण भाविओ भवइ अंतरप्पा णिच्चं अहिगरण करणकारावण- पावकम्मविरए दत्तमणुण्णाय उग्गहरुई । एवमिणं संवरस्स दारं सम्म संवरियं होइ, सुप्पणिहियं, एवं जाव पंचहिं वि कारणेहिं मणवयण-काय-परिरक्खिएहिं णिच्चं आमरणंतं च एस जोगो णेयव्वो धिइमया मइमया अणासवो अकलुसो अछिद्दो अपरिस्सावी असंकिलिट्ठो सुद्धो सव्वजिणमणण्णाओ । एवं तइयं संवरदारं फासियं पालियं सोहियं तीरियं किट्टियं आराहियं आणाए अणुपालियं भवइ । एवं णायमुणिणा भगवया पण्णवियं परूवियं पसिद्धं सिद्धं सिद्धवर-सासणमिणं आघवियं सुदेसियं पसत्थं । त्ति बेमि ||
॥ तइअं अज्झयाणं समत्तं ॥ ॥ तइअं संवरदारं समत्तं ॥
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |