Page Text
________________
प्रश्रव्याकरण सुत्तं
|ब्द
कस्सइ कहेउं वा गिण्हिउँ वा अहिरण्णसुवण्णियेण समलेढुकंचणेणं अपरिग्गहसंवुडेणं लोगम्मि विहरियव्वं । जं वि य हुज्जाहि दव्वजायं खलगयं खेत्तगयं रण्णमंतरगयं वा किंचि पुप्फ-फल-तयप्पवालकंद-मूल-तण-कट्ठ-सक्कराइ अप्पं च बहुं च अणुं च थूलगं वा ण कप्पइ उग्गहम्मि अदिण्णम्मि गिहिउं जे, हणि हणि उग्गहं अणुण्णविय गिण्हियव्वं, वज्जेयव्वो सव्वकालं अचियत्त घरप्पवेसो अचियत्तभत्तपाणं अचियत्तपीढफलग-सिज्जा-संथारग-वत्थ-पत्त-कंबल-दंडग-रयहरणणिसिज्ज-चोलपट्टग-मुहपोत्तिय -पायपुंछणाइ भायण-भंडोवहि-उवगरणं परपरिवाओ परस्स दोसो परववएसेणं जं च गिण्हइ परस्स णासेइ जं च सुकयं, दाणस्स य अंतराइयं दाणविप्पणासो पेसुण्णं चेव मच्छरियं च | जे वि य पीढ-फलग-सिज्जा-संथारग-वत्थ-पाय-कंबल-महपोत्तिय-पाय-पंछणाइ भायणभंडोवहिउवगरणं असंविभागी, असंगहरुई, तवतेणे य वइतेणे य रूवतेणे य आयारे चेव भावतेणे य, सद्दकरे झंझकरे कलहकरे वेरकरे विकहकरे असमाहिकरे सया अप्पमाणभोई सययं
य णिच्चरोसी से तारिसए णाराहए वयमिणं । अह केरिसए पुणाई आराहए वयमिणं ? जे से उवहि-भत्त-पाण-संगहण-दाण-कुसले अच्चंतबालदुब्बल-गिलाण-वुड्ढ-खवग-पवत्ति-आयरिय- उवज्झाए सेहे साहम्मिए तवस्सी कुल-गण-संघचेइयढे य णिज्जरट्ठी वेयावच्चं अणिस्सियं दसविहं बहुविहं करेइ । ण य अचियत्तस्स गिहं पविसइ, ण य अचियत्तस्स गिण्हइ भत्तपाणं, ण य अचियत्तस्स सेवइ पीढ फलग-सिज्जा-संथारग-वत्थ-पाय-कंबल-दंडग-रयहरण-णिसिज्ज-चोलपट्टय-महपोत्तियं पायपुं छणाइ-भायण-भंडोवहिउवगरणं ण य परिवायं परस्स जंपइ, ण यावि दोसे परस्स गिण्हइ, परववएसेण वि ण किंचि गिण्हइ, ण य विपरिणामेइ किंचि जणं, ण यावि णासेइ दिण्णसुकयं, दाऊणं य ण होइ पच्छाताविए, संभागसीले संग्गहोवग्गहकसले से तारिसए आराहए वयमिणं ।
वेयावच्चं वावडभावो इह धम्मसाहणनिमित्तं । अन्नाइयाण विहिणा, संपायणमेस भावत्थो ॥ आयरिय-उवज्झाए थेर-तपस्वी-गिलाण-सेहाणं ।
साहम्मिय-कुल-गण-संघ-संगयं तमिह कायव्वं ॥ इमं च परदव्वहरणवेरमण-परिरक्खणट्ठयाए पावयणं भगवया सुकहियं अत्तहियं पेच्चाभावियं आगमेसिभदं सुद्धं णेयाउयं अकुडिलं अणुत्तरं सव्वदुक्खपावाणं विउवसमणं । तस्स इमा पंच भावणाओ होंति परदव्व-हरण-वेरमण-परिरक्खणट्ठयाए । पढम-देवकुलसभाप्पवावसह-रुक्खमूल-आराम-कंदरागर-गिरि-गुहा-कम्मंत उज्जाण जाणसाला-कुवियसालामंडव-सुण्णघर-ससाण-लेण- आवणे अण्णम्मि य एवमाइयम्मि दग-मट्टिय-बीय-हरिय-तसपाणअसंसत्ते अहाकडे फासुए विवित्ते पसत्थे उवस्सए होइ विहरियव्वं । आहाकम्मबहुले य जे से आसित्त-सम्मज्जिय-उवलित्त-सोहिय-छायण-दूमण-लिंपण अणुलिंपणजलण-भंडचालणं अंतो बहिं च असंजमो जत्थ वड्ढइ संजयाण अट्ठा वज्जियव्वो हु उवस्सओ से तारिसए सुत्तपडिकुढे ।
५
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |