________________
M
प्रश्नव्याकरण सुत्तं
अलिएण य ते पडज्झमाणा असंतएण य अवमाणणपिट्ठिमंसाहिक्खेव पिसुण- भेयण- गुरुबंधवसयण-मित्तवक्खारणाइयाइं अब्भक्खाणाइं बहुविहाइं पावेंति अमणोरमाइं हिययमणमा जावज्जीवं दुरुद्धराइं अणिट्ठ- खरफरुसवयण तज्जण- णिब्भच्छणदीणवयणविमणा कुभोयणा कुवाससा कुवसहीसु किलिस्संता णेव सुहं णेव णिव्वुइं उवलभंति अच्चंतविउलदुक्खसयसंपलित्ता ।
एसो सो अलियवयणस्स फलविवाओ इहलोइओ परलोइओ अप्पसुहो बहुदुक्खो महब्भओ बहुरयप्पगाढो दारुणो कक्कओ असाओ वास- सहस्सेहिं मुच्चइ, ण अवेयइत्ता अत्थि हु मक्खति ।
एवमाहंसु णायकुलणंदणो महप्पा जिणो उ वीरवरणामधेज्जो कहेसी य अलियवयणस्स फलविवागं ।
एयं तं बिईयं पि अलियवयणं लहुसग लहु-चवल-भणियं भयंकरं दुहकरं अयसकरं वेरकरगं अरइरइ-राग-दोस-मणसंकिलेस - वियरणं अलिय-णियडि - साइजोगबहुलं णीयजणणिसेवियं णिस्संसं अप्पच्चयकारगं परमसाहुगरहणिज्जं परपीलाकारगं परमकण्हलेस्ससहियं दुग्गइ-विणिवाय-वड्ढणं पुणब्भवकरं चिर- परिचियमणुगयं दुरंतं । त्ति बेमि ॥
|| बिअं अज्झयणं समत्तं ॥
|| बिअं आसवदारं समत्तं ॥
तइअं अज्झयणं - तइअं आसवदारं
अदिण्णादाणं
जंबू ! तइयं च अदिण्णादाणं हर-दह-मरणभय-कलुस - तासण-परसं-तिग-अभेज्ज-लोभ-मूलं कालविसमसंसियं अहोऽच्छिण्ण तण्हपत्थाण-पत्थो - इमइयं अकित्तिकरणं अण्णज्जं छिद्दमंतरविहुर-वसण-मग्गण-उस्सव मत्तप्पमत्त पसुत्त-वंचणक्खिवण-घायणपरं अणिहुयपरिणामं तक्कर- जणबहुमयं अकलुणं रायपुरिस- रक्खियं सया साहु-गरहणिज्जं पियजण- मित्तजण-भेयविप्पिइकारगं रागदोसबहुलं पुणो य उप्पूरसमरसंगामडमर -कलिकलहवेहकरणं दुग्गइविणिवा य वड्ढणं भवपुणब्भवकरं चिरपरिचिय मणुगयं दुरंतं । तइयं अहम्मदारं ।
तस्स य णामाणि गोण्णाणि हाँति तीसं, तं जहा- चोरिक्कं, परहडं, अदत्तं, कूरिकडं, परलाभो, असंजमो, परधणम्मि गेही, लोलिक्कं, तक्करत्तणं त्ति य, अवहारो, हत्थलहुत्तणं, पावकम्मकरणं, तेणिक्कं, हरणविप्पणासो, आदियणा, लुंपणा धणाणं, अपच्चओ, अवीलो, अक्खेवो, खेवो, विक्खेवो, कूडया, कुलमसी य, कंखा, लालप्पणपत्थणा य, आससणाय वसणं, इच्छामुच्छा य, तण्हागेही, णियडिकम्मं, अप्परच्छं ति य । तस्स एयाणि एवमाईणि णामधेज्जाणि होंति तीसं अदिण्णादाणस्स पावकलिकलुस-कम्मबहुलस्स अगाई ।
10
