Page Text
________________
अणुत्तरोववाइ सुत्त
११
१३ तए णं तं धण्णं कुमारं भद्दा सत्थवाही जाहे णो संचाएइ जाव जियसत्तुं आपुच्छइ ।
इच्छामि णं देवाणुप्पिया ! धण्णस्स दारयस्स णिक्खममाणस्स छत्त-मउड-चामराओ य विदिण्णाओ। तए णं जियसत्तू राया भई सत्यवाहिं एवं वयासी- अच्छाहि णं तुमं देवाणुप्पिए ! सुणिवुत्तवीसत्था, अहण्णं सयमेव धण्णस्स दारयस्स णिक्खमणसक्कारं करिस्सामि | सयमेव जियसत्तू णिक्खमणं करेइ, जहा थावच्चापुत्तस्स कण्हो । तए णं धण्णे दारए सयमेव पंचमुट्ठियं लोयं करेइ जाव पव्वइए | तए णं धण्णे दारए अणगारे जाए ईरियासमिए जाव गुत्तबंभयारी | तए णं से धण्णे अणगारे जं चेव दिवसे मुंडे भवित्ता अगाराओ अणगारियं पव्वइए, तं चेव दिवसं समणं भगवं महावीरं वंदइ णमंसइ वंदित्ता णमंसित्ता एवं वयासी- इच्छामि णं भंते ! तुब्भेहिं अब्भणुण्णाए समाणे जावज्जीवाए छटुं छटेणं अणिक्खित्तेणं आयंबिलपरिग्गहिएणं तवोकम्मेणं अप्पाणं भावेमाणे विह- रित्तए । छहस्स वि य णं पारणयंसि कप्पड़ मे आयंबिलं पडिगाहेत्तए णो चेव णं अणायंबिलं । तं पि य संसटुं णो चेव णं असंसटुं । तं पि य णं उज्झियधम्मियं णो चेव णं णज्झिय धम्मियं । तं पि य जं अण्णे बहवे समण माहण अतिहि- किवण वणीमगा णावखंति | अहासुहं देवाणुप्पिया ! मा पडिबंधं करेह । तए णं से धण्णे अणगारे समणेणं भगवया महावीरेणं अब्भणुण्णाए समाणे हट्ठ-तुढे जावज्जीवाए छटुं छटेणं अणिक्खित्तेणं तवोकम्मेणं अप्पाणं भावेमाणे विहरइ । तए णं से धण्णे अणगारे पढमछट्ठखमणपारणयंसि पढमाए पोरिसीए सज्झायं करेइ । बीयाए पोरिसीए झाणं झियायइ, तइयाए पोरिसीए अतुरियमचवलमसंभंते मुहपोत्तियं पडिलेहेइ, पडिलेहित्ता भायणाई वत्थाइं पडिलेहेइ पडिलेहित्ता, भायणाई पमज्जड़ पमज्जित्ता, भायणाइं उग्गहेइ उग्गहित्ता, जेणेव समणे भगवं महावीरे तेणेव उवागच्छइ, उवागच्छित्ता समणं भगवं महावीरं वंदइ णमंसइ, वंदित्ता णमंसित्ता एवं वयासी- इच्छामि णं भंते! तुब्भेहिं अब्भणुण्णाए छट्ठक्खमण-पारणगंसि काकंदीए णयरीए उच्च-णीय- मज्झिमाइं कुलाइं घरसमुदाणस्स भिक्खायरियाए अडित्तए |
अहासुहं देवाणुप्पिया मा पडिबंधं करेह । १६ तए णं धण्णे अणगारे समणेणं भगवया महावीरेणं अब्भणण्णाए समाणे समणस्स
भगवओ महावीरस्स अंतियाओ सहसंबवणाओ उज्जाणाओ पडिणिक्खमइ, पडिणिक्खमित्ता अतुरियमचवलमसंभंते जुगंतरपलोयणाए दिट्ठीए पुरओ रियं सोहमाणे सोहमाणे जेणेव काकंदी णगरी तेणेव उवागच्छइ, उवागच्छित्ता काकंदीए णयरीए उच्च णीय-मज्झिमाई कुलाइं घरसमुदाणस्स भिक्खायरियं अडमाणे आयंबिलं, पडिगाहेइ णो अणायंबिलं जाव णावकंखंति । तए णं से धण्णे अणगारे ताए अब्भणुणाए पययाए पयत्ताए पग्गहियाए एसणाए एसमाणे जइ भत्तं लभइ, तो पाणं ण लभइ, अह पाणं लभइ तो भत्तं ण लभइ ।
| SR No. | 009909 |
| Book Title | Agam 09 Ang 09 Anuttaropapatik Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 21 |
| Language | Prakrit |
| Classification | Book_Devnagari, Agam, Canon, & agam_anuttaropapatikdasha |
| File Size | 4 MB |