________________
ज्ञाताधर्मकथा
ईहामियं जाव भत्तिचित्तं महग्धं महरिहं विउलं पुप्फमंडवं विरएह । तस्स णं बहुमज्झदेसभाए एगं महं सिरिदामगंडं जाव गंधद्धणिं मुयंतं उल्लोयंसि ओलंबेह, पउमावइं देविं पडिवालेमाणा पडिवालेमाणा चिट्ठह । तए णं ते कोडुंबिय पुरिसा जाव चिट्ठति | तए णं सा पउमावई देवी कल्लं जाव कोडुबियपुरिसे सद्दावेइ, सद्दावित्ता एवं वयासीखिप्पामेव भो देवाणुप्पिया ! सागेयं णगरं सब्भितरबाहिरियं आसित्त- सम्मज्जियोवलित्तं करेह जाव पच्चप्पिणंति। तए णं सा पउमावई देवी दोच्चंपि कोडुबियपुरिसे सद्दावेइ सद्दावित्ता एवं वयासीलहुकरणजुत्तं जाव जुत्तामेव उवट्ठवेंति । तए णं सा पठमावई अंतो अंतेउरंसि ण्हाया जाव लहुकरणजुत्तं(धम्मियं) जाणं दुरूढा | तए णं सा पठमावई णियग-परिवाल-संपरिवुडा सागेयं णगरं मज्झमज्झेणं णिज्जइ, जेणेव पुक्खरिणी तेणेव उवागच्छइ, उवागच्छित्ता पुक्खरिणिं ओगाहेइ, ओगाहित्ता जलमज्जणं करेइ जाव परम सुइभूया उल्लपडसाडया जाइं तत्थ उप्पलाइं जाव गेण्हइ, गेण्हित्ता जेणेव णागघरए तेणेव पहारेत्थ गमणाए । तए णं पउमावईए देवीए दासचेडीओ बहूओ पुप्फपडलग-हत्थगयाओ धूवकडुच्छुयहत्थगयाओ पिट्ठओ समणुगच्छंति ।। तए णं पउमावई सव्विड्ढीए जेणव णागघरे तेणेव उवागच्छइ, उवागच्छित्ता णागघरयं अणुपविसइ, अणुपविसित्ता लोमहत्थगं परामुसइ जाव धूवं डहइ, डहित्ता पडिबुद्धिं रायं पडिवालेमाणी पडिवालेमाणी चिट्ठइ । तए णं पडिबुद्धी राया ण्हाए जाव अलंकिय सरीरे हत्थिखंधवरगए सकोरंटमल्लदामेणं छत्तेणं धरिज्जमाणेणं सेयवरचामराहिं वीइज्जमाणे हय-गय-रह-पवर-जोह-कलियाए चाउरंगिणीए सेणाए सद्धिं संपरिवुडे- महयाभड- चडगर-रह-पहकर-विंद-परिक्खित्ते साकेयं णयरं मज्झं- मज्झेणं णिग्गच्छइ, णिग्गच्छित्ता जेणेव णागघरे तेणेव उवागच्छइ, उवागच्छित्ता हत्थिखंधाओ पच्चोरुहइ, पच्चोरुहित्ता आलोए पणामं करेइ, करित्ता पुप्फमंडवं अणुपविसइ, अणुपविसित्ता पासइ तं एगं महं सिरिदामगंड | तए णं पडिबुद्धी तं सिरिदामगंडं सुइरं कालं णिरिक्खड़, णिरिक्खित्ता तंसि सिरिदामगंडंसि जायविम्हए सुबुद्धिं अमच्चं एवं वयासीतुमं णं देवाणुप्पिया ! मम दोच्चेणं बहूणि गामागर जाव संण्णिवेसाइं आहिंडसि, बहूणि राईसर जाव गिहाई अणुपविससि, तं अत्थि णं तुमं कहिंचि एरिसए सिरिदामगंडे दिठ्ठपुव्वे, जारिसए णं इमे पउमावईए देवीए सिरिदामगंडे ?
४२
