________________
ज्ञाताधर्मकथा
तेणेव उवागच्छंति, उवागच्छित्ता थेरे भगवंते वंदंति णमंसंति, वंदित्ता णमंसित्ता एवं वयासीइच्छामो णं भंते ! महालयं सीहणिक्कीलियं तवोकम्म उवसंपज्जित्ता णं विहरित्तए । तहेव जहा खड्डागं, णवरं चोत्तीसइमाओ णियत्तइ । एगा चेव परिवाडीए कालो एगेणं संवच्छरेणं छहिं मासेहिं अट्ठारसेहि य अहोरत्तेहिं समप्पेड़ । सव्वं पि महालयं सीहणिक्कीलियं छहिं वासेहिं, दोहि य मासेहिं, बारसेहि य अहोरत्तेहिं समप्पेइ ।। तए णं ते महब्बलपामोक्खा सत्त अणगारा महालयं सीहणिक्कीलियं तवोकम्मं अहासुत्तं जाव आराहेत्ता जेणेव थेरे भगवंते तेणेव उवागच्छंति, उवागच्छित्ता थेरे भगवंते वंदंति णमंसंति, वंदित्ता णमंसित्ता बहूणि चउत्थ जाव विहरंति । तए णं ते महब्बलपामोक्खा सत्त अणगारा तेणं उरालेणं तवोक्कमेणं सुक्का भुक्खा जहा खंदओ, णवरं थेरे आपुच्छित्ता चारुपव्वयं दुरुहंति जाव दोमासियाए संलेहणाए सवीसं भत्तसयं अणसणं, चउरासीइं वाससयसहस्साइं सामण्णपरियागं पाउणंति पाउणित्ता चुलसीइं पुव्वसयसहस्साइं सव्वाउयं पालइत्ता जयंते विमाणे देवत्ताए उववण्णा । तत्थ णं अत्थेगइयाणं देवाणं बत्तीसं सागरोवमाई ठिई पण्णत्ता | तत्थ णं महब्बलवज्जाणं छहं देवाणं देसणाई बत्तीसं सागरोवमाई ठिई, महब्बलस्स देवस्स य पडिपण्णाई बत्तीसं सागरोवमाई ठिई पण्णत्ता । तए णं ते महब्बलवज्जा छप्पिय देवा जयंताओ देवलोगाओ आउक्खएणं ठिइक्खएणं भवक्खएणं अणंतरं चयं चइत्ता इहेव जंबुद्दीवे दीवे भारहे वासे विसुद्धपिइमाइवंसेसु रायकुलेसु पत्तेयं पत्तेयं कुमारत्ताए पच्चायाया । तं जहा- पडिबुद्धी इक्खागराया, चंदच्छाए अंगराया, संखे कासिराया, रूप्पी कुणालाहिवई, अदीणसत्तू कुरूराया, जियसत्तू पंचालाहिवई । तए णं से महब्बले देवे तिहिं णाणेहिं समग्गे उच्चट्ठाणट्ठिएसु गहेसु, सोमासु दिसासु वितिमिरासु विसुद्धासु, जइएसु सउणेसु, पयाहिणाणुकूलंसि भूमिसप्पिंसि मारुयंसि पवायंसि, णिप्फण्ण- सस्स-मेइणीयंसि कालंसि, पमुइय-पक्कीलिएसु जणवएसु, अद्धरत्तकाल-समयंसि अस्सिणीणक्खत्तेणं जोगमुवागएणं; जे से हेमंताणं चउत्थे मासे, अट्ठमे पक्खे फग्गुणसुद्धे; तस्स णं फग्गुणसुद्धस्स चउत्थीपक्खेणं जयंताओ विमाणाओ बत्तीससागरोवम- द्विइयाओ अणंतरं चयं चइत्ता इहेव जंबुद्दीवे दीवे भारहे वासे मिहिलाए रायहाणीए कुंभगस्स रण्णो पभावईए देवीए कच्छिंसि आहारवक्कंतीए सरीरवक्कंतीए भववक्कंतीए गब्भत्ताए वक्कंते ।
२०
