________________
ज्ञाताधर्मकथा
णं मया अयमेयारूवे अग्गिसंभवे समणुभूए | तए णं तुम मेहा ! तस्सेव दिवसस्स पच्चावरण्हकालसमयंसि णियएणं जूहेणं सद्धिं समण्णागए यावि होत्था । तए णं तुमं मेहा! सत्तुस्सेहे जाव सण्णिजाइस्सरणे चउदंते मेरुप्पभे णाम हत्थी होत्था । तए णं तुज्झं मेहा ! अयमेयारूवे अज्झत्थिए जाव समुप्पज्जित्था- सेयं खलु मम इयाणिं गंगाए महाणइए दाहिणिल्लंसि कूलंसि विंझगिरिपायमूले दवग्गिसंजायकारणट्ठा सएणं जूहेणं महइ महालयं मंडलं घाइत्तए त्ति कटु एवं संपेहेसि, संपेहित्ता सुहंसुहेणं विहरसि । तए णं तुम मेहा ! अण्णया पढमपाउसंसि महावुट्ठिकायंसि सण्णिवइयंसि गंगाए महाणईए अदूरसामंते बहूहिं हत्थीहिं जाव कलभियाहि य सत्तहि य हत्थिसएहिं संपरिवुड़े एगं महं जोयणपरिमंडलं महइमहालयं मंडलं घाएसि । जं तत्थ तणं वा पत्तं वा कटुं वा कंटए वा लया वा वल्ली वा खाणुं वा रुक्खे वा खुवे वा, तं सव्वं तिक्खुत्तो आहुणिय आहुणिय पाएणं उट्ठवेसि, हत्थेणं गेण्हसि, एगंते एडेसि । तए णं तुम मेहा ! तस्सेव मंडलस्स अदूरसामंते गंगाए महाणईए दाहिणिल्ले कूले विंझगिरिपायमूले गिरिसु य जाव सुहंसुहेणं विहरसि । तए णं मेहा ! अण्णया कयाइ मज्झिमाए वरिसारत्तंसि महाडिकायंसि सण्णिवइयंसि जेणेव से मंडले तेणेव उवागच्छसि, उवागच्छित्ता दोच्चं पि मंडलं घाएसि । एवं चरिमे वासारत्तंसि महाडिकायंसि सण्णिवइयमाणंसि जेणेव से मंडले तेणेव उवागच्छसि; उवागच्छित्ता तच्चं पि मंडलघायं करेसि जाव सुहसुहेणं विहरसि । तए णं तुम मेहा ! अण्णया कयाइं कमेणं पंचसु उउसु समइक्कंतेसु गिम्हकालसमयंसि जेट्ठामूले मासे पायव-संघस-समुट्ठिएणं जाव संवट्टिएसु मिय-पसु-पक्खि-सरीसिवेसु दिसोदिसिं विप्पलायमाणेसु तेहिं बहूहिं हत्थीहि य सद्धिं जेणेव मंडले तेणेव पहारेत्थ गमणाए | [अह मेहा ! तुमं गइंदभावम्मि वट्टमाणो कमेणं नलिणिवणविवहणगरे हेमंते कुंदलोद्धउद्धत तुसारपउरम्मि अइक्कंते, अहिणवे गिम्हसमयंसि पत्ते, वियट्टमाणो वणेसु वणकरेणु विविह-दिण्ण- कय-पसवघाओ तुमं उउयकुसुमकयचामरकण्णपूरपरिमंडियाभिरामो मयवसविगसंत-कड- तड-किलिण्णगंध-मदवारिणा सूरभिजणियगंधो करेणुपरिवारिओ उउसमत्तजणियसोभो काले दिणयरकरपयंडे परिसोसिय-तरुवर- सिहरभीमतरदंसणिज्जे भिंगाररवंतभेरवरवे णाणाविहपत्त - कट्ठ - तणकयवरुद्धत - पइमारुयाइद- नहयलदुमगणे वाउलियादारुणयरे तण्हावसदोस-दसियभमंत- विवहसावयसमाउले भीमदरिसणिज्जे वदंते दारुणम्मि गिम्हे;
१३४
