Page Text
________________
ज्ञाताधर्मकथा
तए णं से सेणिए राया कोडुबियपुरिसे सद्दावेइ, सद्दावेत्ता एवं वयासी- गच्छह णं तुब्भे देवाणुप्पिया ! सिरिघराओ तिण्णि सयसहस्साई गहाय दोहिं सयसहस्सेहिं कुत्तियावणाओ रयहरणं पडिग्गहगं च उवणेह, सयसहस्सेणं कासवगं सद्दावेह । तए णं ते कोडुबियपुरिसा सेणिएणं रण्णा एवं वुत्ता समाणा हद्वतुट्ठा जाव सिरिघराओ तिण्णि सयसहस्साइं गहाय कुत्तियावणाओ दोहिं सयसहस्सेहिं रयहरणं पडिग्गहगं च उवणेति, सयसहस्सेणं कासवगं सद्दावेंति । तए णं से कासवए तेहिं कोडुबियपुरिसेहिं सद्दाविए समाणे हढे जाव हियए, पहाए जाव अलंकियसरीरे; जेणेव सेणिए राया तेणामेव उवागच्छइ, उवागच्छित्ता सेणियं रायं करयल जाव एवं वयासी- संदिसह णं देवाणप्पिया ! जं मए करणिज्जं ।
तए णं से सेणिए राया कासवयं एवं वयासी- गच्छाहि णं तुम देवाणुप्पिया! सुरभिणा गंधोदएणं णिक्के हत्थपाए पक्खालेहि, सेयाए चउप्फालाए पोत्तीए मुहं बंधित्ता मेहस्स कुमारस्स चउरंगुलवज्जे णिक्खमणपाउठगे अग्गकेसे कप्पेहि । तए णं से कासवए सेणिएणं रण्णा एवं वुत्ते समाणे हद्वतुट्ठ जाव पडिसुणेइ, पडिसुणेत्ता सुरभिणा गंधोदएणं हत्थपाए पक्खालेइ, पक्खालित्ता सुद्धवत्येणं मुहं बंधइ, बंधित्ता परेणं जत्तेणं मेहस्स कुमारस्स चउरंगुलवज्जे णिक्खमणपाउग्गे अग्गकेसे कप्पइ । तए णं तस्स मेहस्स कुमारस्स माया महरिहेणं हंसलक्खणेणं पडसाडएणं अग्गकेसे पडिच्छइ, पडिच्छित्ता सुरभिणा गंधोदएणं पक्खालेइ, पक्खालित्ता सरसेणं गोसीसचंदणेणं चच्चाओ दलयइ, दलइत्ता सुद्धेणं वत्थेणं बंधेइ, बंधित्ता रयणसमुग्गयंसि पक्खिवइ मंजूसाए पक्खिवइ, पक्खिवित्ता हार-वारिधार-सिंदुवार-छिण्णमुत्तावलि-पगासाइं अंसूई विणिम्मुयमाणी-विणिम्मुयमाणी, रोयमाणी-रोयमाणी, कंदमाणी-कंदमाणी, विलवमाणीविलव माणी, एवं वयासी- एस णं अम्हं मेहस्स कुमारस्स अब्भुदएसु य उस्सवेसु य पसवेसु य तिहीसु य छणेसु य जण्णेसु य पव्वणीसु य अपच्छिमे दरिसणे भविस्सइ त्ति कटु उस्सीसमूले ठवेइ । तए णं तस्स मेहस्स कुमारस्स अम्मापियरो उत्तरावक्कमणं सीहासणं रयाति । मेहं कुमारं दोच्चं पि तच्चं पि सेयापीएहिं कलसेहिं ण्हावेंति, पहावेत्ता पम्हलसुकुमालाए गंधकासाइयाए गायाडं लहेंति, लहित्ता सरसेणं गोसीसचंदणेणं गायाडं अणलिंपति अणुलिंपित्ता णासा-णीसासवाय-वोज्झं जाव हंसलक्खणं पडगसाडगं णियंसेंति, हारं पिणटुंति, अद्धहारं पिणखेंति, एवं एगावलिं मुत्तावलिं कणगावलिं रयणावलिं पालंब पायपलंबं कडगाइं तुडियाई केऊराइं अंगयाइं दसमुद्दियाणंतयं कडिसुत्तयं कुंडलाइं चूडामणिं
| SR No. | 009906 |
| Book Title | Agam 06 Ang 06 Gnatadharma Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 220 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 5 MB |