________________
ज्ञाताधर्मकथा
सिंचमाणी पओहरे, कलुण-विमण-दीणा रोयमाणी कंदमाणी तिप्पमाणी सोयमाणी विलवमाणी मेहं कुमारं एवं वयासीतुमं सि णं जाया ! अम्हं एगे पुत्ते इढे कंते पिए मणण्णे मणामे थेज्जे वेसासिए सम्मए बमए अणुमए भंडकरंडगसमाणे रयणे रयणभूए जीविय-उस्सासए हिययाणंद-जणणे उंबरपुप्फ व दुल्लहे सवणया किमंग पुण पासणयाए ? णो खलु जाया ! अम्हे इच्छामो खणमवि विप्पओगं सहित्तए | तं भुंजाहि ताव जाया ! विउले माणुस्सए कामभोगे जाव ताव वयं जीवामो । तओ पच्छा अम्हेहिं कालगएहिं परिणयवए वढिय-कुलवंसतंतुकज्जम्मि णिरवेक्खे समणस्स भगवओ महावीरस्स अंतिए मुंडे भवित्ता अगाराओ अणगारियं पव्वइस्ससि | तए णं से मेहे अम्मापिऊहिं एवं वुत्ते समाणे अम्मापियरं एवं वयासी- तहेव णं तं अम्मयाओ! जहेव णं तुम्हे ममं एवं वयह- तुम सि णं जाया ! अम्हं एगे पुत्ते, तं चेव जाव णिरवेक्खे समणस्स भगवओ महावीरस्स जाव पव्वइस्ससि | एवं खलु अम्मयाओ ! माणुस्सए भवे अधुवे अणियए असासए वसणसओवद्दवाभिभूए विज्जुलयाचंचले अणिच्चे जलबुब्बुयसमाणे कुसग्गजलबिंदु-सण्णिभे संझब्भराग-सरिसे सुविणदंसणोवमे सडण-पडणविद्धंसण-धम्मे पच्छा पुरं च णं अवस्स-विप्पजहणिज्जे । से के णं जाणइ अम्मयाओ ! के पुट्विं गमणाए ? के पच्छा गमणाए ? तं इच्छामि णं अम्मयाओ ! तुब्भेहिं अब्भणुण्णाए समाणे समणस्स भगवओ महावीरस्स जाव पव्वइत्तए |
तए णं तं मेहं कुमारं अम्मापियरो एवं वयासी- इमाओ ते जाया! सरिसियाओ सरिसत्तयाओ सरिसव्वयाओ सरिसलावण्ण-रूव-जोव्वण-गुणोववेयाओ सरिसेहितो रायकुलेहितो आणिल्लियाओ भारियाओ, तं भुंजाहि णं जाया ! एयाहिं सद्धिं विउले माणुस्सए कामभोगे, तओ पच्छा भुत्तभोगे समणस्स भगवओ महावीरस्स जाव पव्वइस्ससि ।
तए णं से मेहे कुमारे अम्मापियरं एवं वयासी- तहेव णं तं अम्मयाओ ! जं णं तुब्भे ममं एवं वयह- इमाओ ते जाया ! सरिसियाओ जाव समणस्स भगवओ महावीरस्स पव्वइस्ससि | एवं खलु अम्मयाओ ! माणुस्सगा कामभोगा असुई वंतासवा पित्तासवा खेलासवा सुक्कासवा सोणियासवा दुरुस्सास-णीसासा दुरूव मुत्त-पुरीस-पूय-बहुपडिपुण्णा उच्चार-पासवण-खेल-जल्ल-सिंघाणग-वंत-पित्त-सुक्क-सोणियसंभवा अधुवा अणियया असासया सडण-पडण- विद्धंसणधम्मा पच्छा पुरं च णं अवस्स-विप्पजहणिज्जा | से के णं जाणइ अम्मयाओ! के पव्विं गमणाए ? के पच्छा गमणाए! तं इच्छामि णं अम्मयाओ ! जाव पव्वइत्तए ।
